Мадярьскый реалізм

Минувшый тыждень україньскый презідент Володимір Зеленьскый підписав закон, котрым ся мала обмеджіти незалежность протикорупційных урядів, днесь підписав закон, котрым ся незалежность тых урядів має обновити. А не быв то лем тиск уліці.

Є вопросом, ці ся україньскый презідент обще боїть даякых протестів на уліці. Омного векшу вагу бы єм при тій зміні позіції клав на факт, же з обмеджіньом незалежности тых урядів мала проблему Европска унія. В тій справі телефоновала зо Зеленьскым Урсула фон дер Леєн, жадала „поясніня“, і діпломатічно, але барз ясно вказала, же тадыль путь до Унії не іде.

Кедь ся посмотирме на то, што іщі днесь україньскый презідент знає людям даякым способом обіцяти, якбач уж зістала лем выснена Унія.

На НАТО при сучасных обывателях Білого дому мож забыти, закінчіня войны перемогов є з векшой міры натеперь лем у верзії желаня, так як і здобытя вшыткых Російов окупованых теріторій. Не є то нич, што бы нас мало тішыти, але то суть натеперь факты, о котрых уж бісідують і найвекшы підтримователі Києва на Западі.

Зато може ани не так уліця, але тиск Брусела посадив Зеленьского по дашто веце як тыждню знова за стіл, жебы підписав закон, якый має зрушыти закон, котрый підписовав недавно. Страта іщі і того, жебы мати якусь візію о европскій Україні, бы уж якбач реално могла затрясти із стілцьом презідента, і він бы міг впасти. А то бы не хотів.

Лемже і кедь Зеленьскый наконець „вернув“ на европску путь, не треба забывати на то, же на тій пути стоїть мадярьскый реалізм, котрый не буде так легко перескочіти.

При участи 2 284 732 людей было проти вступу Україны до Унії 95 процент.

VOKS 2025 – якыйсь неофіціалный мадярьскый референдум о вступі Україны до Европской унії, котрый зорґанізовала влада Віктора Орбана, має про Україну немилосердны резултаты. При участи 2 284 732 людей было проти вступу Україны до Унії 95 процент. Віктор Орбан уж одкрыто бісідує о тім, же Мадярьско вступ не підпорить, ани кебы кыякы з неба падали.

Лідер опозіції Петер Мадяр, котрого партія TISZA веде в сондажах уж аж о 10 процент над Орбановов партійов Fidesz, бісідує о тім, же тот референдум быв сфалшованый. Але реторіку змінив і він. Покля іщі пару місяців тому ясно підтирмовав україньскы намагы, днесь уж говорить о тім, же ускореный вступ Україны до Унії не підтримує. Уж і він жадать наперед перейти собі окремыма фазами переговорів, сповнити условія. Як собі тым перешли і іншы членьскы державы.

Не знаме, яка буде далша політіка Віктора Орбана, покля в слідуючім році знова выграть вольбы і буде премєром. Ці ся найде кшефт, за котрый днесь некомпромісну протиукраїньску позіцію што до членства в Унії в Бруселі продасть. Але знаме, же покля бы быв премєром Петер Мадяр, Київ буде мусити повнити условія, іншак може блоковати вступ до Унії і він.

Но а не мож забывати на то, же і кедь є Петер Мадяр днесь в очах западных політіків даяков „демократічнов надійов“ Мадярьска, тот самый Мадяр уж нераз ясно вказав, же ани через нього не перейде безкарно недотримованя народностных прав Мадярів, котры жыють на Підкарпатю.

Мадярьскый реалізм є такый, же будьхто выграє далшы вольбы, Київ ся проблемы рішіня меншыновых прав не збуде. Навспак, з боку Будапешту буде все ясно наставленый блок в приступовых переговорах, покля ся тоты права не вырішать.

То бы нас могло тішыти, але попри мадярьскім реалізмі ту маєме і тот русиньскый. А тот ясно вказує, же нам мадярьскый реалізм не поможе. Проблемов є, же в нашій справі не маме реалных союзників. Мадяры думають за себе, за своїх, не за Русинів. А так є то і в далшых членьскых країнах, в котрых жыєме.

Покля такых союзників на політічній сцені, а тым думам релевантных політіків, не найдеме, пак ся можеме на україньско-мадярьскы споры смотрити з попкорном як в кіні, але про нас щастливый конець філму не чекайме.

Статя была написана як коментарь „Вступне до контроли“ лемківского радія lem.fm. Ілустрація: AI/ChatGPT.