В рамках проєкту з Ужгородом в Сабінові почали з діґіталізаційов історічных обєктів

В Сабінові почали діґіталізацію выбраных історічных обєктів, котра має помочі заховати културну і історічну дідовизну. Як інформовав аґентуру TASR коордінатор 3D мапованя міста Павол Ваврек, при обєктах проходить детайлне збераня даных в екстерьєрі і інтерьєрі, і то за помочі дронів, статічных 3D сканерів ці шпеціалных камер.

Припоминаме, же діґіталізація реалізує ся в рамках проґраму Interreg NEXT HUSKROUA, котрый заміряный є на меджіреґіоналну співпрацу на пригранічній теріторії країн – Мадярьско, Словакія, Румунія і Україна. Предметом того проєкту є 3D мапованя, сканованя і фотоґраметрія выбраных обєктів у Сабінові і Ужгороді.

„Тоты технічны апараты докажуть створити точны хмары пунктів. Так выникать тридімензіоналный діґіталный одпечаток реалности з точностьов аж на міліметры,“ повів Ваврек.

В Сабінові заміряли ся на історічный центер міста, містьску дзвоніцю, історічны містьскы муры, Римокатолицькый костел святого Йоана Креститаля, Євангелицькый костел і Римокатолицькый костел Дівы Марії.

По діґіталізації в Сабінові буде робити ся тот процес в партнерьскім у тім проєкті місті – Ужгороді. Там ся буде діґіталізовати Ужгородьскый замок, котрый належыть меджі найнавщівльованішы памяткы, і в котрым має свою експозіцію Закарпатьскый музей народной архітектуры і бываня.

Діґіталізація реалізує ся в рамках проєкту з назвов Діґіталны рішіня про історічну дідовизну міст Ужгород і Сабінів, на котрый суть вырахованы кельчікы в сумі понад 332 тісяч вер, причім дашто высше 299 тісяч евр дала на проєкту як дотацію Европска унія.

Цільом є захопити актуалный стан архітекточных памяток до детайлного діґіталного запису, котрый буде служыти нелем на приправу проєктовой документації в припаді потребы реконштрукчных робот, але і як підклад про баданя ці віртуалны експозіції в будучности.

Резултатом буде колекція точных 3D моделів у діґіталній подобі, включно фізічной макеты єдного з обєктів, маповых підкладів і технічных выступів, якы будуть доступны і посередництвом забезпеченых онлайн платформ ці різных маркетінґовых продуктів.

Фото: Wikipedia/Йозеф Котуліч.