Віруючі стрітили ся на одпусті в Шашовій

В днях 9-го і 10-го авґуста 2025-го року в найстаршім путницькім місці Пряшівской ґрекокатолицькой єпархії – русиньскім селі Шашова, одбыв ся традічный архієпархіалный одпуст повязаный із праздником Успенія Пресвятой Богородіці.

Як інформовав Пресовый центер Пряшівской архієпархії, в суботу по посвячіню воды із жрідла Пресвятой Богородіці проґрам продовжовав великов вечурньов з літійов і завершыв ся архієрейсков літурґійов, котру одправляв Высокопреосвященый владыка Йона Максим, пряшівскый архієпіскоп і митрополіта.

Недільный проґрам почав Акафістом ку Пресвятій Богородіці і молитвов ружанця. Головным пунктом проґраму была Божественна літурґія, котру служыв архімандріта Марко Дурлак – протосінкел Пряшівской архієпархії.

Шашова, котра є філійов парохії Ортутова, находить ся в Бардейовскім окресі. Із свойов Іконов Пресвятой Богородіці з Дітинов на руках, яка є із 15-го столітя, і котра ся подля канонічной візітації із 1834-го року споминать як miraculosa (чудотворна), є Шашова найстаршым путницькім місцьом Пряшівской архієпархії.

Точнішы даны о чудах повязаных з тов іконов ся не сохранили, але о тім, же ся ту діяли чуда, свідчіть цінный документ, писмо Папы Пія VI. iз 30-го юна 1779-го року, в котрім ся пише о уділіню повноміцных одпустків про храм в Шашовій на 7 років. Документ быв подля канонічной візітації із 1834-го року уложеный в храмі, в кивоті.

Кедьже повноміцны одпусткы были про храм в Шашовій уділены уж в 1779-ім році, мож конштатовати, же путованя віруючіх ку тій іконі почало омного скоріше в минулости. Од 1845-го року в Шашовій одбывають ся каждый рік одпусти при нагоді праздника Успенія Пресвятой Богородіці.