Сумар дня на 19. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 19. серпня/авґуста 2025 р.

В коросняньскым повіті пострілено медведя

В минулым тыжни в Липовци коло Яслиск, в коросняньскым повіті, спостережено тяжко ранного медведя. Як передал директор Маґурского Нацийонального Парку, звіря нашло ся поза територийом парку, не было тіж в отулині, але в тяжкых ситуациях зо звірятами власти парку сут інформуваны і допомагают. Парк спілпрацує з ветеринарями з Фундациі «Дикій Проєкт» в Ґорлицях. То як раз іх кликали перше до ратуваня медведя, а пак до проведіня секциі. Был то молодый особник, 2-3-літній з вагом коло 80 кґ. Мал сліды раны по кули. Звіря было пострілене пару дни скорше, а на його тілі розвинула ся заавансувана мушыця. Найпевнійше в рану вдала ся інфекция, котра добила медведя. Як подают ветеринарі, медвід барз ся мучыл. Справом заняла ся єдниця поліциі з Коросна, котра бере до увагы, же звіря было пострілене на Словациі, де в остатнім часі выдано згоду на одстріліня понад 300 особників. Не згаджают ся з тым зоолоґы, котры подают, што в такым стані медвід не был в силі перейти більше як кілометр і пострілити го мусіли по польскій страні.

Andy Warhol. A Kind of Retrospective

Уж 11. вересня/септембра в ґалериі Старый Бровар в Познані мож буде видіти выставу «Andy Warhol. A Kind of Retrospective» присвячену творчости іконы поп-арту. Цілый проєкт основаный єст на звіданю, в якій спосіб творчіст єдного артисты проникнула до так вельох обшыри сучасного жытя і чом його візиі цілый час діют з таком силом. За словами куратора, сучасна попкультура то діло Варголя. Выстава складат ся з ориґінальных ґрафік, поляройдів, фільмовых прац і ескізів. Припоминат она архівальны реклямы і окладинкы проєктуваны Варгольом. В більшости експозиция складат ся з експонатів з Музею Енді Варголя в Піттсбурґу. Выставу мож буде обзерати до 28. лютого/фебруара 2026 рока.

Енді Варголь в Кракові

А іщы лем десят дни в Малопольскым Центрі Наукы Коґітеон в Кракові мож обзерати выставу «Енді Варголь. Діалоґ з поп-артом». Презентуваны експонаты, а єст іх понад 100, походят з єдиного в Европі Музею Енді Варголя в Меджелабірцях. Окрем робіт памяток, котры походят зо словацкого музею, на експозициі презентуваны сут тіж артефакты з приватных колекций. Серед них коло 30 окладинок вінильовых платен запроєктуваных Варгольом з колекциі музичного журналисты. Краківска експозиция окрем артистичного контексту має тіж науковый аспект, якій был зрыхтуваный во спілпрацы з Академійом Красных Штук ім. Яна Матейкы і Музичном Академійом в Кракові. Выстава єст доступна до 29. серпня/авґуста.

В Леопольдові упамятнили жертвы комуністичного режіму

15. серпня/авґуста в Леопольдові прошло упамятніня несправедливо і протиправно вязненых комуністичным режімом. Подію орґанізувала Конфедерация політичных вязнів Словациі разом з Ґенеральным директориятом Збору вязеньской і юстичной сторожы. В упамятніню участ брал м.ин. Высокопреосвященый Йона Максим, пряшівскій архієпископ і митрополита. Проґрам зачал ся од літургіі, котру служыл кыр Йона. Пак участны перешли під браму леопольдівского арешту, де находят ся памятковы таблиці. Там тіж одспівали панихіду. В пєтній подіі брал тіж участ публичный охранця прав, омбудсман Словацкой Республикы, Роберт Доброводскій, котрый підкрислил, як важна єст памят о жервах комуністичного режіму та охорона свободы жытелів, особливо в днешніх часах.