Сумар дня на 2. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 2. вересня/септембра 2025 р.

Вмер отец протодіакон Василий Дубец 

З жальом інформуєме, што по тяжкій хвороті вчера, 1. вересня/септембра вмер отец протодіакон Василий Дубец. Смутну відоміст передала Канцелярия Православного Митрополиты Варшавского і цілой Польщы. Отец Василий Дубец вродил ся в 1955 р. в Любіні. Был абсольвентом Православной Духовной Семінариі та Высшой Православной Духовной Семінариі в Варшаві. Полнил функцию дириґента в ріжных єпархіях – во Вроцлаві, в Кракові, в Білымстоку. В 1989 р. принял дяконьскы свячыня з рук блаженной памяти архієпископа Адама, товдышнього єпархы перемышльско-новосандецкой єпархіі. Од 1992 рока аж до смерти служыл і вюл хор в Катедрі св. Миколая в Білымстоку. Отец Дубец понад сорок років орґанізувал Православны Вечеры Коляд в Білымстоку та Білостоцкы Дни Церковной Музикы. Посліднє пращаня покійного зачне ся днес о 19.00 год. в соборі св. Миколая Чудотворця панахідом. Служба Божа і обряд похорону пройдут заран так само в соборі св. Миколая в Білымстоку о 8.00 год., пак в Ганчовій 4. вересня/септембра правлена буде Служба Божа з панахідом і похорон на тамтышнім цмонтери. Парохія св. Миколая Чудотворця орґанізує автокар до Ганчовой і покрыват половину коштів, охочы прошены сут о скоршый контакт. Вічна Йому Памят!

В селі Шайовпалфола на Мадярах прошол традицийный русиньскій одпуст

Як што рока в остатню неділю серпня/авґуста в селі Шайовпалфола на Мадярах прошол традицийный русиньскій одпуст. Вірны пришли до грекокатолицкой церкви Святого Духа помолити ся перед іконом Павловской Пресвятой Богородиці. І того рока орґанізаторами одпусту было Вседержавне Русиньскє Самосправуваня. Подія зачала ся утренійомі і архієрейском літургійом, котру служыл Преосвященый владыка Атаназ Орос, мішкольцскій єпарха. Літургія была служена по мадярскы і в церковнославяньскым языку. Вєдно з владыком служыл отец Атіла Кіш – містный парох. По літургіі голос забрал Віктор Крамаренко, председа Вседержавного Русиньского Самосправуваня, котрый поґратулювал владыці Атаназови і Яношови Кожняньскому, што были  недавно нагороджены. Владыка Атаназ – Золотым ланцом, Янош Кожняньскій отримал Золотый Крест Мадяр за вызначну діяльніст для сохраніня материньского языка, культурной спадковины і традиций. По святій літургіі вірны пішли в процесиі, а на конец взяли участ в стрічы з почастунком. Была і можливіст одвидити традицийну хыжу, одкуплену Вседержавным Русиньскым Самосправуваньом, в котрій актуально находит ся меленькій русиньскій музей і бібліотека.

Выстава «Двурнік-Дровняк. Інспірациі»

Музей Сандецкой Землі просит на вернісаж выставы «Двурнік-Дровняк. Інспірациі», котрый пройде 6. вересня/септембра в Музею Никыфора в Креници. Выстава то діалоґ медже двома вызначныма артистами, Никыфором і Едвардом Двурніком, єдным з найбільш розпознавальным польскых малярів ХХ ст., котрый в молодых роках захопил ся творчістю креницкого мастера. Выстава то част святкуваня упамятнінь 130. річниці народжыня Никыфора. В рамках выставы презентуваных буде 40 прац Двурніка з контрастовыма образами Никыфора, што разом творит простір до діалоґу і передумань. Выставу мож буде обзерати до 23. листопада/новембра.

Ремонт дворця PKP в Креници штораз ближе

Креницкій самоуряд отримал дофінансуваня на ремонт дворця PKP. Заряд Малопольского Воєвідства передал понад 9 млн зл на выконаня найпотрібнійшых робіт. Згідні з пляном одновлена буде почекальня для подорожуючых разом з пристосуваньом решты поміщынь на потребы пасажерів. Додатково в середині найде ся нова простір зо сценом і місце для орґанізуваня меншых стріч. Іщы в вересни/септембрі самоуряд хоче оголосити конкурс оферт на выконавцю задачы.

Fot. Paweł Iwaniuk