Русинам на Словакії буде присвячена поштова марка

На кінцю авґуста 2025-го року портал Поштовой філателістічной службы POFIS публіковав Емісный план словацькых поштовых марок на 2026-ый рік. Документ одкликує ся на дві жрідла – Міністерство транспорту, будованя і реґіоналного розвитку Словацькой републікы і Словацьку пошту.

За даным документом в слідуючім році выйде поштова марка, котра буде присвячена Русинам на Словакії.

Выданя поштовой маркы є наплановане на 13-го марца 2026-го року. Назва емісії є Народностны меншыны на Словакії: Русины на Словакії. Затля не є публіковане ани чісло емісії, ани форма друку, но номінална ціна маркы є встановлена на 3 евра.

Як є звыком при выдаваню такых марок, вєдно з тым буде в тот день выдана копертка і печатка. Вшыткы три бы мали мати ґрафіку повязану з темов. Ціна маркы з копертков, на котрій є печатка ку дню выданя емісії є все высша.

Буде то першый раз, што Словацька пошта буде мати емісію маркы присвяченой Русинам. В минулости были емісії, котры были повязаны з Русинами. Пошта выдала наприклад марку з америцькым войновым геройом русиньского походжіня Михалом Стренком, а так само марку присвячену Памятнику 1-го Чехословацького армадного корпусу ґенерала Людвіка Свободы, в котрім бойовали і Русины.

Но теперь першый раз в історії буде емісія присвячена прямо третій найвекшій народностній меншыні на Словакії.

За нашыма інформаціями іщі в минувшім році Інштітут русиньского языка і културы Пряшівской універзіты в Пряшові звернув ся до Словацькой пошты із жадостьов, жебы выдати поштову марку в 2025-ім році, котра бы была присвячена 30-му юбілею кодіфікації русиньского языка на Словакії. Нажаль, до емісного плану на тот рік тота тема не дістала ся.

Наконець буде марка выдана в слідуючім році, а Словацька пошта мотівы, котры бы могли быти на поштовій марці, копертці і печатці, конзултовала із Словацькым народным музейом – Музейом русиньской културы в Пряшові. Потвердила то нашій редакції директорка музея Люба Кральова. Но фінална верзія того, што на них будеме наконець видіти, зіставать затля таємніцьов.

Ілустрація: ChatGPT.