В Новоселіці одкрыли ареал енвіроменталной выховы

В русиньскій Новоселіці, Сниньского окресу, в суботу 6-го септембра 2025-го року одкрывали новый Енвіроцентер. Новый Ареал енвіроменталной выховы має помочі селу схосновати свій потенціал наповно.

Як інформовала аґентура TASR, село подля старосты Василя Дініча находить ся прямо в Народнім парку Полониныі, і своїм положіньом має ідеалны обставины стати освітньов дестінаційов, де будуть годны навщівници спознавати природу, і навчіти ся, як єй хранити.

Проєкт Новоселіця фінанцовала із Плану обновы, самосправа на нього здобыла 1,7 міліона евр.

„Новоселіця є вступнов бранов до Народного парку Полонины, і зато мы вырішыли тот потенціал наповно схосновати. Выбудованя ареалу нам поможе нелем звекшыти чісло навщівників у реґіоні, але і помочі в области енвіроменталной освіты, котра буде на хосен про школы і шырокый округ людей,“ повів Дініч.

В рамках ареалу є Інформачный центер в зреконштруованім Домі културы, де навщівници здобудуть інформації о околіці, природі і охрані жывотного оточіня. Будова служыть і як мултіфункчный простор на орґанізованя освітніх і културных подій.Ареал енвіроменталной выховы продовжує в екстерьєрі, де суть різны елементы на граня про діти, научна стежка ці меншый амфітеатер. В рамках проєкту зробила ся і оцельова лавка через ріку Збой.

На отворіня Новоселіця порихтовала і културный проґрам, в котрім выступали фолклорны ансамблі, музиканты, про діти были приготовлены гры і змаганя, промітали ся філмы, але мож было абсолвовати і коментовану переглядку ареалу.