Сумар дня на 16. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 16. вересня/септембра 2025 р.

Вілямівскій вызнаный Польскым Соймом за реґіональный язык

В пятницю 11. вересня/септембра Польскій Сойм принял закон о вызнаню вілямівского за реґіональный язык. Працы над вписаньом языка до закону тырвали од років. В минулым місяци соймова Комісия Нацийональных і Етнічных Меншын позитивно заопініювала проєкт, по тым як експерты потвердили, же вілямісвскій сполнят вшыткы формальны вымогы. Закон перешол уж через палямент, остал іщы підпис президента. По його зложыню вілямівскій язык офіцияльно буде частю правного систему, што одкрыє дорогу до його охороны, промоциі і вчыня. Меншыновый закон дотля вызнавал лем єден реґіональный язык – кашебскій.

26. стріча єпископів східніх католицкых церкви в Европі

В днях 8.-11. вересня/септембра в столици Австриі одбыла ся 26. стріча єпископів східніх католицкых церкви в Европі. В стрічы брало участ 65 єпископів, і понад 100 представників східніх католицкых церкви в Европі. Традицийно присутны были і єпископы русиньской традициі, котра выходит з Ужгородской уніі. По стрічы в Відни в пятницю 12. вересня/септембра одбыло ся на Єпархіяльным уряді в Братиславі 40. пленарне засіданя Рады єрархів Грекокатолицкой церкви на Словациі. Веце на тоту тему чытайте в дописі на нашым портали.

Дальшы дофінансуваня в рамках Европейскых Фондів для Малопольщы

Заряд Малопольского Воєвідства вытипувал наступных 39 проєктів, котры отримают дофінансуваня в рамках Европейскых Фондів для Малопольщы. Проєкты тыкают підпоры культуры, туристикы, модернізациі доріг, курортів та водопроводів. Разом признано понад 171 млн зл. Згідні з розпоряджыньом Заряду в рамках спертя курортовых обшыри дофінансуваня отримат 5 задач реализуваных в Вапенным, Пивничній, Рабці і Высовій. В Вапенным розбудувана буде паркова стрефа. Першый етап інвестициі обнимат будову пляцу забав, едукацийного села для діти, тиролькы та стальовой лавкы долгости понад 100 метрів. Так само в Высовій дофінансуваня перезначене буде на розбудову парку. В рамках проєкту в парку найдут ся загальнодоступны зоны руховой і сенсоричной терапіі, модерный водный пляц з пляжом та новы едукацийны стежкы. Згідні з пляном розбудова парку закінчыт ся в серпни/авґусті 2027 рока. Місто Пивнична отримало два дофінансуваня, єдно на ремонт Дому Культуры, другє допоможе заґаздувати два курортны паркы. Як подал маршалок Малопольского Воєвідства, Лукаш Смулка, реализация проєкту піднесе туристичну вартіст курортів, але тіж буде хосенна для жытелів курортів.

Працы русиньскых візувальных творців на выставі в Празі

В четвер 11. вересня/септембра в ґалериі Лапідариюм в Празі одбыл ся вернісаж выставы пн. «Выходословеньска модерна. Сон о роднім краю». Выстава была реализувана під покровительством посла Словацкой Республикы в Чешскій Республиці – Мартіна Мураньского і Словацкого Інституту в Празі. Выстава могла ся зреализувати і завдякы выдатній помочы Словацкого Нацийонального Музею – Музею Русиньской Културы в Пряшові, котрый до той експозициі пожычыл 22 образы од десятьох авторів. Выстава презентує 51 образів і фотоґрафій переважно русиньскых візуальных творців. Дрібниці чытайте в дописі на нашым портали.

Стріча зо Станіславом Криціньскым в Радружы

Музей Кресів в Любачові та Церковный Комплекс в Радружы разом з партнером Любачівскым Повітом просят на десяту стрічу з циклю «Бесіды на Пограничы». Стіча з істориком, автором многых публикаций на тему Бєщадів, Низкого Бескіду і Лемковины, Станіславом Криціньскым пройде 21. вересня/септембра в церкви в Радружы. В бесіді, котру поведе Аґнєшка Пєя, Криціньскій оповіст о своій «перемышльскій трилоґі». Стріча зачне ся о 18.00 год., вступне дармо, на місци мож буде купити книжкы з автоґрафом автора.