Одбыла ся 1-ша Митрополітна путь до Маріяповчі

Ґрекокатолицькы єпіскопи, священици і віруючі в понедільок 15-го септембра 2025-го року путовали де Мадярьска, де одбыла ся 1-ша Митрополітна путь Ґрекокатолицькой церькви на Словакії в Маріяповчі.

Путь проходила в день, коли на Словакії римокатолици святкують праздник Семистрастной Дівы Марії – Покровителькы Словакії, і ґрекокатолици на Словакії в тот день мають праздник Сострадальной Пресвятой Богородіці.

1-ша Митрополітна путь до Маріяповчі проходила в Юбілейнім році 2025, але надвязує на дакількорічну традіцію такых одпустів Кошыцькой єпархії, як і на стовкы років путованя ґрекокатоликів на тото вызначне путницьке місце. За Пряшівску архієпархію о тім інформовав Михал Лещішін.

Понад тритісяч віруючіх

Віруючі вшыткых трьох єпархій были веджены своїма єпіскопами. Головным служытельом архієрейской літурґії быв Высокопреосвященый Йона Максим, пряшівскый архієпіскоп і митрополіта, голова Ґрекокатолицькой церькви sui iuris на Словакії.

Проповідь тримав Высокопреосвященый архієпіскоп Кіріл Василь, кошыцькый єпарха, за Братіславску єпархію быв участный помічный єпіскоп – кір Мілан Лах. На путь пришло і понад сто священиків.

Духовный проґрам почав Акафістом ку Пресвятій Богородіці. На Божественній літурґії взяв участь і Высокопреосвященый Філіп Кочіш, гадудороґскый архієпіскоп і митрополіта, голова Ґрекокатолицькой церькви sui iuris в Мадярьску, як і владыка Авел Сочка, ніредьгазськый єпарха, під которого єпархію теріторіално належыть Маріяповч.

Тоты бологлужіня одбыли ся в ареалі перед базиліков, де звыкнуть робити ся такы великы одпусты.

На кінцю торжества ся духовенство і віруючі пересунули до Базилікы святого Михаіла Архістратига, де перед Чудотворнов іконов Маріяповчанськой Пресвятой Богородіці помолили ся участны із своїма архіпастырями Молебен ку Пресвятій Богородіці.

По молебені владыкове ішли помолити ся і до кріпты під базиліков, де є окрем іншого похованый Михаіл Мануіл Ольшавскый, мукачовскый єпарха, родак із села Ольшавіця на Спішу, одкыль є і кір Йона Максим. Ольшавскый заслужыв ся за розбудованя Маріяповчі як духовного центра.

Маріяповч

Містечко Маріяповч, яке є недалеко міста Ніредьгаза, є єдным із найвекшых путницькых місць в Мадярьску, і стародавным путницькым місцьом ґрекокатоликів, котры походять із Ужгородьской унії, і якы суть дітми Матери Церькви – Мукачовской ґрекокатолицькой єпархії.

В старім деревянім храмі, іщі втогды в селі Повч, у 1696-ім році повторяло ся чудо, кедь рыдала ікона Пресвятой Богородіці. Молитвы перед тов іконов были много раз выслуханы, а приписує ся тій іконі і перемога прінца Євґена Савойского над Турками в році 1697.

Оріґінал іконы быв пізніше на приказ цісаря Леополда І. перевезеный до Дому святого Штефана у Відню, де є дотеперь. Містным жытелям была подарована лем копія той іконы з року 1707, но і тота прославила ся чісленныма чудами, рыданьом, выздоровлінями, і выслуханыма молитвами.

В роках 1731 аж 1749 на місці деревяного храму была збудована сучасна Базиліка святого Михаіла Архістратига.