Орґанізація молоды.Русины на сеймі выбрала нового председу. Став ним Мафтей Допіряк

Од 11-го до 14-го септембра 2025-го року проходив 16-ый Табор з молодыма по русиньскы в селі Малый Липник, котрый орґанізує обчаньске здружіня молоды.Русины.

В рамках табора вже традічно одбыв ся і сейм орґанізації. Быв то вже 18-ый сейм, на котрім по двох роках проходили і вольбы нового председы орґанізації а членів Выконного выбору. Як інформовала орґанізація на своїм сайті на соціалній сіті Facebook, членове собі в неділю на сеймі выбрали нового председу, котрым став Мафтей Допіряк, якый є і членом презідії Округлого стола Русинів Словакії, в котрім є у функції секретаря.

Допіряк вычеряв на посаді Марека Гребіка, котрый быв председом молодежной орґанізації чотыри рокы, значіть два функчны періоды.

„Новыма членами Выконного выбору стали Растіслав Ясик, Вероніка Імріхова, Нікола Кучерава, Філіп Імріх, Марек Гребік і Мірослав Імріх,“ інформовала орґанізація з тым, же бывшому председови подяковали за чотыри рокы „інтензівной роботы нелем про розвиток орґанізації, але і русиньского руху на Словакії“.

Орґанізація молоды.Русины далше поінформовала, же в рамках Табора з молодыма по русиньскы мали і далшый проґрам – едукачны актівности.

„Іщі в четверь і пятніцю дакотры нашы членове брали участь на V. Меджінароднім конґресі русиньского языка,“ написали молоды. Почас табора мали лекції на інтересны темы.

„Мафтей Допіряк нам приближыв, як штучный інтелект рушать світом, етнолоґ Тімотей Федор із Музея русиньской културы зясь побісідовав о звыках повязаных з народжіньом і смертьов у традічній културі Русинів.“

В участны продовжовали лекційов на тему сучасного стану русиньской літературы на Словакії, котру собі приготовив Михал Павліч, робітник Інштітуту русиньского языка і културы Пряшівской універзіты в Пряшові. На табор пришов і голова Общества святого Йоана Крестителя – отець Мілан Ясик, котрый молодым одслужыв літурґію на церьковнославяньскім і русиньскім языку, а так само побісідовав о тім, яку сімболіку мають літурґічны ризы.

Табор з молодыма по русиньскы, в рамках котрого одбыв ся і сейм орґанізації, і тот рік міг быти реалізованый вдяка фіначній підпорі з Фонду на підпору културы народностных меншын.