Сумар дня на 23. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 23. вересня/септембра 2025 р.

Днес першый ден Медженародного Конґресу о Меншынах

Медженародный Конґрес о Меншынах то дводньова подія орґанізувана Опольскым Університетом, лучыт науку, політку і соспільну практику, жебы бесідувати о вельокультуровости і місци меншын в Европі. В Конґресі участ берут експерты в Польщы і заграниці, представникы уряду, Сойму, Комісиі Прав Чловека ОЗН та меншыновых і етнічных середовиск. Днес присутны берут участ в выіздовым засіданю Спільной Комісиі Уряду та Нацийональных і Етнічных Меншын. Дискусиі тыкают і політикы державы взглядом меншын та охороны реґіональных і меншыновых языків. На Конґресі з рефератами до лемківской темы выступуют Беата Орловска з Академіі ім. Якуба з Парадижа в Ґожові, Олена Дуць-Файфер з Ягайлоньского Університету і Штефан Дудра з Зеленогірского Університету.

Прятаня цмонтерів з періоду І світовой войны в Низкым Бескіді

Гірксій Клюб «Орлы» при Столичній Коменді Поліциі разом з бургомайстрами міст Біч, Бобова, Цєнжковиці, Тухова та війтами Ґмін Ґорлиці, Липинкы, Лужна, Мощениця, Ропа, Санкова і Устя Рускє просят на десяту едицию Прятаня цмонтерів з періоду І світовой войны. Акция пройде в днях 9.-11. жолтня/октобра. Акция обнята єст патронатом м.ін. Амбасадора Словацкой Республикы в Польщы, Головного Коменданта Полициі, Воєводы Малопольщы і Підкарпатя та ґенеральных консулів Мадяр, Німец і Австриі. В остній ден подіі, в Ждыни буде пройде короткє підсумуваня акциі получене з презентацийом фотоґрафічной выставы Вальдемара Добровольского пн. «Ґалицийскы цмонтері – по 100 роках». Орґанізаторы заохочают каждого до спільного діяня для охороны історичной спадковины.

Фестіваль Резонансы уж в половині жолтня

В першій половині жолтня/октобра пройде Фестіваль Резонансы, котрого цілю єст в вынятковый спосіб ожывити забытковы церкви і костелы з підкарпатского Шляку Деревяной Архітектуры через музику. Подія пройде в днях 10.-12. жолтня/октобра. То три дни полны концертів, стріч з традицийом, натуром і штуком в особливым просторі. Першый ден фестівалю пройде в церкви св. Параскєвы в Лівчы, другого дня музика выполнит церкви, што ся находат в селах Прусє і Радруж, а закінчыня пройде в церкви в Радружы і Корчмині. Орґанізаторы задбали тіж о додатковы атракциі, такы як природничы прогулькы, забава ци варштаты для діти. Проґрам подіі находит ся на офіцияльным сайті Фестівалю Резонансы. На варштаты обовязуют скоршы записы.

26 кєрмеш в Лопянці в першу неділю жолтня

Кустош церкви в Лопянці, Збишек Кашуба, просит на 26 кєрмеш в Лопянці. Як і в попередніх роках, подія пройде в першу неділю жолтня/октобра, што в тым році припадат на 5 ден того місяця. Святкуваня зачнут ся о 10.00 годині од ружаньцовой молитвы, а пак о 11.00 годині мож буде взяти участ в Святій Літургіі. В часі кєрмешу буде тіж можливіст купити выробы ручной роботы од локальных і не лем творців. Охочы заінтересуваны запрезентуваньом своіх робіт прошены сут о скоршый контакт з кустошом, жебы отримати акцептацию.