В Білках одбыла ся беатіфікація Петра Павла Ороса

В суботу 27-го септембра 2025-го року одбыла ся велика історічна дія нелем про Мукачовску ґрекокатолицьку єпархію. До села Білкы на Підкарпатю пришли єпіскопи і духовенство із Україны, европскых держав і Америкы. В тот день одбылпо святочне выголошіня за блаженого священомученика Павла Петра Ороса.

Як інформовав сайт Мукачовской ґрекокатолицькой єпархії, торжественну Божественну літурґію очолив Преосвященый владыка Теодор Мацапула, мукачовскый єпарха, у співслужіню із кардіналом Ґжеґожом Рисьом, папскым леґатом, і апостольскым нунційом на Україні Вісвалдасом Кульбокасом, многыма єпіскопами із Україны і споза граніць, як і стовками священиків.

На тото велике торжество, кедь Мукачовска єпархія мала выголошеного другого блаженого по священомученикови Теодорови Ромжови, а єдночасно першый раз беатіфікація одбыла ся дома – на Підкарпатю, пришли і тісячі віруючіх, домашніх, із решты Україны, як і зо заграніча.

Чін беатіфікації почав просьбов од імени Мукачовской ґрекокатолицькой єпархії зачіслити до лику блаженых Петра Павла Ороса. Пак была прочітана біоґрафія нового блаженого.

Далше кардінал Рись прочітав апостольскый лист Святішого Отця Лева XIV., в котрім Вселеньскый Архієрей вызнав мученицьку смерть Петра Павла Ороса, і встановив дату його літурґічной памяти на 27-го септембра.

Почас Величенія торжественно внесли мощі і ікону блаженого Петра Павла. Пак владыка Теодор подяковав за себе, і за цілу єпархію за дар выголошіня блаженого. Літурґія потім продовжовала співом тропаря і кондака, котры уж были на праздник Петра Павла Ороса.

Кардінал Ґжеґож Рись тримав на торжестві і проповідь. В тім самім часі, коли в Білках проходила беатіфікація, в Римі была авдієнція, в рамках котрой Папа римскый Лев XIV. спомянув і беатіфікацію.

„Днесь в Білках, на Україні, проходить беатіфікація священика Петра Павла Ороса із Мукачовской єпархії, котрый быв убитый у 1953-ім році в ненавісти до віры. Коли заборонили Ґрекокатолицьку церьков, він лишыв ся вірным наступникови святого Петра, і продовжовав сміло выконовати своє служіня в ілеґалности, усвідомлюючі собі різіка,“ повів Лев XIV. Почас авдієнції.

Беатіфікація Петра Павла Ороса є великов історічнов дійов про вшыткых ґрекокатоликів русиньской традіції, котрых Матірь Церьков є Мукачовска єпархія. Якраз історічна русиньска церьков має з новым блаженым уж пять блаженых новомучеників – Теодора Ромжу, Павла Петра Ґойдіча, Василя Гопка, Мефтодія Домініка Тырчку, і теперь Петра Павла Ороса.