В Ужгороді бісідовали о черезгранічній співпраці із сусідами

Як інформовав сайт Закарпатьской областной воєньской адміністрації (областна державна адміністрація в часі войны, позн. ред.), веджіня области зорґанізовало 26-го септембра 2025-го року стрічу за участи діпломатів Румунії, Мадярьска і Словакії.

На стрічі были участны ґенералный конзул Словацькой републікы в Ужгороді Ріхард Сасаі, конзул Румунії в Солотвині Ґраціан-Флорін Пірву, і ґенералный конзул Мадярьска в Ужгороді Йожеф Бачкаі.

„Нас капчать много добрыx діл, котры мы зробили і продовжуєме робити про укріпіня партнерства нашых держав,“ повів на стрічі голова Закарпатьской областной воєнськой адміністрації Мірослав Білецькый.

Як далше інформовав сайт адміністрації, почас стрічі быв обговореный стан проєктів, котры ся реалізують в рамках проґрамів Interreg NEXT: Румунія – Україна, Польща – Україна, і Мадярьско – Словакія – Румунія – Україна. Єдночасно бісідовало ся о перспектіваx пририхтовати сполочны ґрантовы проєкты у слідуючіх ґрантовых вызвах.

Підкарпатя має iз каждов споминанов країнов розроблены вызначны проєкты черезгранічной спілпраці, котры дотулають ся будованя пригранічной інфраштруктуры, розшырьованя існуючіх і одкрываня новых гранічных переходів, але і в далшых областях.

Білецькый на стрічі одпрезентовав діпломатам турістічну ціклостежку по схылах Карпат, котра може стати атракційов нелем Підкарпатя, але сусідніх реґіонів в Румунії, Словакії, Мадярьску і Польщі.

„Кедь споїме силы, годны будеме про турістів приготовити атракцію із довжков понад 800 км, дякуючі котрой турісты будуть мати можливость спознати културу, історію, і кухню пятьох країн,“ повів голова адміністрації Мірослав Білецькый з тым, же то стане вызначным імпулзом про розвиток сел і проглубліня контактів меджі містным населіньом.

Обговорены были так само многы події, в рамках котрых акцент дає ся на черегранічну співпрацу. Іде о сполочны конференції і форумы, новы можливости інвестіцій ці перспектівы початку новых ініціатів.

Жрідло фотоґрафії: Закарпатьска областна воєнська адміністрація.