Сумар дня на 3. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 3. жолтня/октобра 2025 р.

«Може ся не верну» – выстава малярства Давида Здобыляка

О тыжден, в пятницю 10. жолтня/октобра в Ґалериі Штукы в Малопольскым Центрі Культуры Сокіл в Новым Санчы одбуде ся вернісаж выставы малярства Давида Здобыляка пн. «Може ся не верну». На выставі буде запрезентуваный найновшый цикль образів артисты, навязуючый до його лемківскых коренів і дідовизны та траґічной долі лемківского народу. Вернісаж зачне ся о 18.00 год. і товаришыла му буде дискусия з участю культурознавці і історика штукы дра Михала Шымко, тыкаюча презентуваного малярского циклю та контекстів лемківской культуры. Выставу мож буде обзерати уж од найблизшого понеділька 6. жолтня/октобра до 2. листопада/новембра тр.

Лыжной стациі в Щавнику не реактивуют той зимы

Ґміна Мушына фурт хоче ся старати о будову лыжной стациі в Щавнику, мимо неґативной постановы Реґіональной Дирекциі Охороны Середовиска. Бургомайстер Мушыны Ян Ґольба рахує на зміну підходу в звязку зо змінами власти інституциі, і деклярує отвертіст на бесіды з новым директором. З плянів будовы лыжного осередка не выцофали ся ани Польскы Кабельны Желізниці. Подля бургомайстра в постанові выданой Реґіональном Дирекцийом Охороны Середовиска неє арґументів за тым, што інвестиция має неґативне влияня на охорону природы. Внескы з рапорту о діяню інвестициі на середовиско сут інчы як рішыня дирекциі. В звязку з браком згоды неє шанс на одкрытя по роках перервы вытягів в Щавнику в найблизшым зимовым сезоні.

Розбудова очыщален воды в ґміні Устя Рускє

Кінчыт ся модернізация очыщален воды в ґміні Устя Рускє. Самоуряд выдал понад 12 млн злотых на роботы при будинках в Ганчовій і Устю Рускым. Розбудова позволит на підлучыня дальшых місцевости. Особы заінтересуваны прилучыньом до сіти можут ся зголошувати до Уряду Ґміны в Устю Рускым. Окрем того самоуряд має заплянуваный новый одтинок канализациі в Квятони. Кєд найдут ся середкы на выконаня робіт, то інвестиция може быти зреализувана о пару місяців.

Неодолга може рушыти будова геліпаду в Креници

Тырвают стараня о будову геліпаду для гелікоптерів Авіяцийной Ратівничой Службы в Креници. Новосандецкій повіт мусит достати середовискове рішыня для плянуваной інвестициі. Як подал староста Тадеуш Заремба, проєктуваня плянуване єст до кінця того рока. За старостом, воєвода потвердил, што єст можливіст сфінансуваня будовы з середків на оборону цивільной людности, кєд же вписує ся в сценарий уставы. Кошты будовы геліпаду сут чыслены на 3 млн злотых. Новосандецкій староста рахує, што геліпад в Креници возникне в І або ІІ кварталі 2026 рока.

Варштаты для діти в Рускій Бурсі

Припоминаме, што уж заран, в суботу, 4. жолтня/октобра, од самого полудня в Рускій Бурсі в Ґорлицях будут проходити варштаты для діти. Малы артисты будут мати нагоду помалювати сой кошелькы. Варштаты вела буде Олена Дуць. Орґанізатор забезпечат материялы, то є білы кошелькы і фарбы – старчыт прити. Вступ єст дармовый.