Сумар дня на 30. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 30. жолтня/октобра 2025 р.

Осіннє засіданя Собору Єпископів ПАПЦ

27. жолтня/октобра в Варшаві засідал Собор Єпископів ПАПЦ. Рішано так зовнішні, як і внутрішні справы тыкаючы православной Церкви. Серед тых внутрішніх справ владыкы рішыли о вызначыню загальномитрополитарной збіркы фондів на потребы дакотрых лемківскых парохій. В листопаді/новембрі 2026 р. одбуде ся колекта на церков в Реґєтові, в січни/януарі 2027 на церков в Зеленій Горі, а в лютым/фебруарі 2027 на церков в Мальчыцях. Рішено признати Ордер св. Мариі Магдалины вірным – Лемкам: Мариянови Шкуратови, Адамови Гербутови, Осифови Чырняньскому і Олені Хомяк.

Збірка на памятникы на санківскым цмонтери

Ґміна Санкова оголосила, што одбуде ся збірка для реновациі і призабытых памятників на парохіяльным цмонтери в Санковій. Колекта одбуде ся 1. листопада/новембра при брамах – входах на тот цмонтрів. Завдякы збіркам з попередніх едиций повело ся выремонтувати вельо цінных обєктів будучых свідоцтвом істориі парохіі і локальной соспільности. За зобраны того рока грошы орґанізаторы будут ремонтувати дальшы памятникы.

В Перечыні одкрили таблицю Мирославови Тіршови

28. жолтня/октобра в ден 107. річниці выникнутя I Чехословацкой Республикы, до котрой приєднала ся і територия Русинів, включно Підкарпатской Руси, в комплексі Туряньска долина в Перечыні одкрыли памятну таблицю Мирославови Тіршови. Інформувал о тым Володимiр Чубірко – політик, бывшый голова Закарпатской Oбластной Рады. Таблиця є ініциятивом Клюбу Томаша Ґаріка Масарика в Ужгороді, котрый старат ся о захованя істориі Чехословацкой Республикы на Підкарпатю, і веде го Іван Латко. Мирослав Тірш в 1862 р. в Празі основал тіловыховну орґанізацию Сокіл. Основныма ідеями Сокола были фізичны способности, демокрация, патріотизм, социяльnа справедливіст і братска дружба. По выникнутю Чехословациі орґанізация отримала назву Чехословацка громада сокольска, і пошырила ся на територию Словациі і на Підкарпатскій Руси. 28. жолтня/октобра 1932 р. Тіршови в Ужгороді торжественно одкрыли бюсту.

Свидник з дальшыма інвестициями

Місто Свидник здобыло в рамках стратеґіі Мiстецкого розвитку кєруваном комунітом в проґрамовым періоді 2014-2022 підпору для пятьох проєктів в цілковитій сумі веце як 215,500 евро. З джерел Проґраму розвитку реґіону были підпорены штырі проєкты в сумі більше як 182,600 евро і з Інтеґруваного Реґіонального Операцийного Проґраму єден проєкт в сумі 32, 900 евро. Місто так інвестувало в рамках єднотливых проєктів до 50,000 евро до ревітализациі пішой зоны, частичной реконструкциі просторів на футбольовым стадийоні, оправы амфітеатру, модернізациі мультіфункцийного боіска при Основній школі Карпатска і до інчых справ.