Партнеры із словацького і польского боку в Заґужі підписали договор о співпраці

Як інформовало місто Меджілабірці на своїм офіціалнім сайті на сіті Facebook, дня 14-го новембра 2025-го року в Заґужі одбыла ся стріча польско-словацькых представителів турістічного руху і културы в рамках партнерьского проєкту під назвов Черезгранічне подорожіня в часі із віртуалным монахом, котрый є фінанцованый із проґраму Interreg Польща – Словакія 2021 – 2027.

„Подія проходилиа в Центрі културы Foresterium, котрый находить ся в прекрасных розвалинах кармелітаньского монастыря, якы суть єдным із найвыразнішых сімболів реґіону,“ інформовало місто.

Цільом стрічі было підпорити розвиток черезгранічных інтеґрованых турістічных понук, посилнити роль културы і турістічного руху в економічнім розвитку теріторії, і помочі ку соціалній інклузії. „В рамках проґраму занимали сьме ся резултатами дотеперішніх проєктів Interreg Польща – Словакія, і тым, як новы атракції збогачують понуку реґіону.“

Як далше інформовало місто Меджілабірці, єднов із рихтованых новот є цілорічна експозіція із голоґрамом монаха, іншталована внутрі обєкту Foresterium. „Тота модерна форма презентації історії уможнить розшырити турістічну сезону на цілый рік – без огляду на погоду ці актуалны обставины.“

Тота стріча мала і далшый важный пункт, котрым было підписаня взаємного Договору о співпраці, якый іщі веце укріплять довгорічне партнерство меджі польскыма і словацьмыа субєктами. „Вдяка ньому можеме продовжовати в сполочнім розвитку турістічных продуктів, і ефектівно надвязовати на успішны актівности Interreg Польща – Словакія.“

Меджілабірці інформовали, же довгодоба співпраца міста і Ґміны Заґуж приносить до реґіону новы принагоды в области културы і рекреації. Вєдно будують ся перепоєны турістічны трасы, модерны навщівницькы атракції, і черегранічный розвиток посувать ся на высшу уровень.

Цілковы кошты споминаного проєкту представлюють майже 39 тісяч евр, із чого дотація із Европского фонду реґіоналного розвитку творить 80 процент цілковых коштів.