Одбыло ся засіданя Світовой рады русиньской молодежи

В суботу 29-го новембра 2025-го року в сербскім Коцурі одбыло ся 4-те засіданя Світовой рады русиньской молодежи Світового форуму русиньской молодежи (СРРМ СФРМ). Інформовав о тім секретарь Іван Лікар.

На засіданю взяли участь предсидателька СФРМ Светлана Бойчук із Румунії, підпредседа Александер Грічко із Словакії, Матей Бурчак із Хорватії, Яну Томкову із Чеськой републікы заступала Вероніка Словікова, і секретарь Іван Лікар. Гостів привітав домашній член Рады Срдян Ґовля із Сербії.

Проґрам засіданя мав сім пунктів, в рамках нього обговорила ся і Стріча русиньской молодежи, котра бы мала одбыти ся в Новім Орахові у 2026-ім році. Членове бісідовали і о планах роботы до будучности.

Світовый форум русиньской молодежи планує офіціалну реґістрацію, подобно як то має Світовый конґрес Русинів, на Міністерстві внутрішніх справ Словацькой републікы. На основі реґістрації СФРМ буде годен одкрыти собі банковый рахунок, а пак і жадати дотації на свою діятельность.

Проєкт стрічі молодых, котра бы мала одбыти ся в Новім Орахові в слідуючім році, одпрезентовав на засіданю Дарко Заґорац – член Форуму молодых орґанізації Руска матка. Подля планів бы стріча мала тырвати три дні. Із каждой членьской орґанізації СФРМ бы мали брати участь трьоми аж штирми участници у віці од 18 до 30 років.

В Коцурі обговорили на засіданю і зміны в штатуті, котрый бы мав быти згодный із словацькыма законами. Засіданя комісії про зміну штатуту бы мало проходити в януарі або фебруарі слідуючого року.

Засіданя СРРМ одбыло ся в рамках 15-го Меджінародного фестівалу гумору і сатіры Коцурска чутка. Як інформовав секретарь Іван Лікар, далше засіданя є наплановане онлайн формов на 18-го децембра.