Ден Копальників в любіньскій парохіі

Традицийно уж – 4. грудня/децембра любіньска парохія св. Тройці орґанізувала центральны празднуваня Дня Копальників – Нижньшлезской Православной Копальничой Братиі.

Як в попередніх роках, Божескій Літургіі проводил в тот ден владыка Юрий, архієпископ вроцлавско-щеціньскій. Паралельно проходили в любіньскым костелі св. Максимилияна римокатолицкы богослужыня.

Покровителька є з вами

За юлияньскым календарьом в тот ден выходит праздник Введіня во храм Пресвятой Богородиці. В західнім порядку 4. грудня/децембра то памят св. Великомучениці Варвары – яка традицийно єст покровительком копальників.

Богослужыня окрем владыкы справляли місцевый парох – о. Богдан Репела, якій рівночасно єст Православным Капеляном Копальників, Ґенеральным Почестным Копальняным Директором, та приіздны з владыком ігумен Спиридом (Кузяк) і діакон Мєчыслав Олеснєвич.

При вході до храму пастыря повитал Копальняный Комітет в особах Марияна Шкурата, Адама Гербута і Петра Феша. Уж на вході, копальникы передали подячны слова для владыкы Юрия за участ в тогорічных празднуванях та за духову опіку.

Дальше слово мал о. Богдан Репела, якій привитал владыку і почестных гостів – серед них м.ін. Головного Директора KGHM дс. Копальництва, Директора дс. Працовничых KGHM oдділіня Любін, Директора Головного Одділіня Гуты Міди «Ліґниця» ци Теодора Габуру – Полномічного Заряду KGHM дс. спілпрацы з самоурядами. Присутны были і локальны самоурядовці, м.ін. Війт Ґміны Любін, Війт Ґміны Рудна та представникы служб.

До храму перед літургійом были введены штандаровы почты. Владыка в проповіди до копальників звернул угаву на вынятковый вымір літургічного жытя. Приближыл свято Введенія во храм Пресвятой Богородиці, підкрисляючы його понадчасовый характер і вказуючы на Родичів Богородиці – Йоакыма і Анну, іх одданя і довіря для Господа, вірy, покорy і мудріст.

В тот ден вынятково владыка Юрий підкрислял, як важна є для нас і для цілой державы тяжка штоденна робота копальнкиків. Просил, штобы копальникы не забывали о штоденній молитві і довірю до свойой покровителькы – св. Варвары.

Копальникы – з ордерами

На завершыня богослужыня владыка надал Ордеры Св. Рiвноастольной Мариі Магдалины III ступени вірным любіньской парохіі. Серед них нашли ся Мариян Шкурат, Адам Гербут, Йосиф Чырняньскій і Oленa Хомяк, а тіж Похвальный Лист Адамови Стафинякови за роботу на хосен правоцлавной Церкви.

Владыка так само подякувал за тогорогічну, першу в істориі, присутніст копальників в іх поломництві на Святу Гору Ґрабарку.

Скорше же, бо 16. листопада/новембра 2025 р. капелян о. Богдан Репела і репрезентация любіньскых копальників (Мариян Шкурат, Адам Гербут і Владислав Шляхтич) пришли з офіцийном візитом до вроцлавской єпископской резиденциі. Товды то владыка з делеґацийом бесідували на тему діяльности нижньошлезскых копальників.

фот. парохія св. Тройці в Любіні