Стріча редакторів ЛЕМ.фм+

При нагоді Нацийонального Свята Лемків – 6. грудня/децембра 2025 р. в просторах Руской Бурсы проходила стріча редакторів радия і порталю ЛЕМ.фм+.

В рамках порады ансамбль підсумувал текучый 2025 р. Ведуча Стоваришыня «Руска Бурса» в Ґорлицях Наталия Малецка-Новак представила основны статистикы, односячы ся так до входів на інформацийный порталь www.lem.fm, як і до слухальности нашого радия.

Ідеме в гору

Видно, што проєкт ЛЕМ.фм фурт ся розвиват. Чысло слухальности (лем онляйн, без статистик з высылачів в Ґорлицях і Польковицях) за період січен-листопад 2025 р. то 133 179. За аналоґічный період в 2024 р. чысло слухальности было 104 618. 

Кєд іде о місця, з якых нас найчастійше слухате, то на першым місци в 2025 р. є Польща, пак м.ін. Зъєднаны Штаты Америкы, Німці, Украіна, Словация, Фінляндия ци Мадяры.

Кєд іде о статистикы дописів на порталь, то в сумі за січен-листопад того рока разом опубликували сме 832 статій (345 то дописы до части новины, погляды і 487 – заповіди проґрамів і сумары дня). За тот період однотували сме 317 905​ входів на сайт. А статистикы з плятформы Meta (Facebook) подают засагы – входы в чыслі 628 413​. 

Нове студийо

В рамках стрічы редакторы отворили спільно одсвіжене головне студийо, што містит ся в будинку ґорлицкой бурсы. Поміщыня было додатково выглушене.

Плянуючы розписку авдиций на будучый рік, редакторы рішали, што змінити, што додати, жебы іщы ліпше трафляти до нашых слухачів інтересуючым змістом.

На стрічы не змогли быти присутны вшыткы редакторы і спілпрацівникы редакциі. Кєд бы зрахувал вшыткых редакторів і особы, якы спілпрацуют з ЛЕМ.фм+, нашло бы ся іх кільканадцет.

Традицийно стрічы редакторів ЛЕМ.фм одбывают ся што найменьше трираз до рока. Все в марци при нагоді Загального Зобраня Членів Стоваришыня «Руска Бурса» в Ґорлицях, 2. липця/юлия (або в ден близкій тій даті) при нагоді упамятніня дальшых річниц смерти думкодавці першого лемківского радия – бл. п. Богдана Ґамбаля і як раз в при нагоді Нацийонального Свята – Дня Русинів Польщы, што выходит 5. грудня/децембра 2025 р.