Председа ОСРС стрітив ся із молодыма Русинами

Дня 29-го децембра 2025-го року в Бардейові одбыла ся стріча молодых русиньскых актівістів, умелців і шпортовців із председом Округлого стола Русинів Словакії (ОСРС) Міланом Яном Піліпом і віцепріматором міста Бардейов Петром Петрушом.

Участників стрічі поздоровив і пріматор міста Бардейов Борис Ганущак. За ОСРС быв участный і секретарь Мафтей Допіряк.

Меджі запрошеныма гостями были Івана Бріллова – співачка і гражданьска актівістка, Крістіан Гнат і Іван Гудак із ґрупы Calibri Gang, Лукаш Сорока – MMA борець, і Якуб Воробель – дзвоноліярь.

Головным цільом стрічі было підпорити розвиток русиньской ідентіты меджі молодыма людми, створити простор на презентацію їх творчости, успіхів і гражданьскых актівностей, а єдночасно посилнити взаємну соналежность членів русиньской народности жыючіх на Словакії.

„Потребуєме заміряти ся на молоду ґенерацію, бо цільом ОСРС, але і далшых русиньскых орґанізацій на Словакії, є захованя русиньской народности, языка і културы. Без молодой ґенерації не є будучности жадному народу. Іде о людей, котрым сьме хотіли такым способом подяковати за їх актівности, роботу, і мотівовати їх до далшой роботы. Много людей їх слідує, і знають ословити молоду ґенерацію, што є наш ціль,“ повів про аґентуру TASR председа ОСРС Мілан Ян Піліп.

Піліп за найважнішу тему, котров треба занимати ся, поважує школство. „Русиньске школство, жаль, на Словакії є барз бідне. Маєме лем дві школы із навчалным языком русиньскым,“ звернув увагу председа платформы.

Як далше підкреслив, Русинів на Словакії прибывать, а помагають тому і умелці, котры голосять ся ку русиньскій народности. „Но єдночасно чуєме асімілачный тренд,“ повів Піліп.

ОСРС высловлює подякованя вшыткым участникам, як і самосправі міста Бардейов за співпрацу і даня просторів на реалізацію стрічі.