Сумар дня на 22. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 22. грудня/децембра 2025 р.

Ґорлицкій повіт достал близко 880 тисячів злотых на дорогы

Понад 4 млн злотых на дорогы вплынуло до двох малопольскых повітів. Тым разом з Урядового Фонду Розвитку Доріг скорыстали новотарскій і ґорлицкій повіты. Як подал малопольскій віцевоєвода Ришард Смялек, іде о транзитовы трасы, котрых перебудова значучо звекшыт комфорт ізды шоферів. Ґорлицкій повіт достал близко 880 тис. злотых. Дофінансуваня має помочы в одновліню двох одтинків Ропа-Брунары. Як підкрислил ґорлицкій староста Мирослав Вальонґ, дорога фактично вымагат пильной помочы, яка буде тыкала ремонту покрытя, перебудовы двох одтинків дорогы долгости ок 1,2 км. Інвестиция причынит ся до звекшыня безпекы в дороговым руху на обшыри ґорлицкого повіту. Працы мают быти выконаны в 2026 р. Як подал віцевоєвода, вступный спис дофінансувань для самоурядів в рамках фонду на 2026 р. был уж высланый до міністерства, котре мусит тепер заакцептувати пропозициі. Сут то дорогы зголошены представниками ґмін, міст і повітів в посліднім наборі. На початку рока мож ся сподівати дальшых дофінансувань.

Зелене світло для дальшых етапів будовы «сандечанкы»

Ґенеральный Директор Охороны Середовиска в Варшаві підтримал середовискове рішыня Реґіонального Директора Охороны Середовиска в Кракові, што окрислят нову трасу державной дорогы нр 75 з Бжеска до Нового Санча. Дає то зелене світло для дальшых етапів будовы тзв. «сандечанкы». Перше буде рішена Проґрамова Концепция, што окрислит фінальный уклад доріг і проведіня ґеолоґічных досліджынь. Дальшыма етапами буде отриманя Позволіня на Реализацию Дороговой Інвестициі і початок будовляных прац. Як подала Ґенеральна Дирекция Доріг і Автострад – інвестор, в першій черзі плянуют реализацию трьох одтинків, котры не родят соспільного спротиву. В припадку дальшых двох одтинків передвиджено дальшы консультациі і увзглядніня опініі локальной соспільности. Такій підхід подля віцеміністра інфраструктуры Станіслава Буковця позволит в першій черзі зреализувати близко половину інвестициі і єдночасно піднести рівен безпекы на державній дорозі нр 75. Будова дорогы была унята в Урядовым Проґрамі Будовы Державных Доріг до 2030 р., з перспективом до 2033 р., зато інвестиция має забезпечене фінансуваня. Окрем зліпшыня безпекы на дорозі жытелі західньой Лемковины будут мати значучо скороченый час доізду до Кракова.

Крениця заінвестує в Паркову Гору 

Крениця зачынат реализацию дальшой інвестициі – ревітализацию Парковой Горы. Ґміна отримала на тот проєкт уж понад 9,5 млн злотых дофінансуваня з Европейского Фонду Реґіонального Розвитку. Як інформувал бургомайстер Крениці Пьотр Рыба, штырі з оферт зложеных в конкурсі містят ся в квоті меншой як 12,5 млн злотых. На Парковій Горі появит ся м.ін. нове покрытя стежок, модерне освітліня і выняткова Пчоляча Закутина.

Велийна стріча в Рускій Бурсі

Припоминаме, што уж в найближшу суботу 27. грудня/децембра, Стоваришыня «Руска Бурса» в Ґорлицях просит до участи в традицийній велийній стрічы. Для части буде то уж третій ден свят, а для некотрых – фурт іщы передсвяточный період. Без огляду на термін святкуваня – прошены сут вшыткы – ждати будут на вас клясичны смакы – кєселиця, грибы, горох, фізола, перогы. Перед гощыньом выступут Терочка, а пак просиме на спільне колядуваня. До бурсы мож приходити уж од рана в суботу 27. грудня/децембра, а выступ Терочкы і госитна заплянуваны сут на 16.00 год.