Нескора одповідь о скорім приступліню

На фоні того, же україньскый презідент Володимір Зеленьскый має быти приготовленый стрітити  із російскым презідентом, жебы вырішыти ключовы вопросы, котры боронять тому, жебы закінчіти войну, в тых днях веце зарезоновали слова німецького канцеларя Фрідріха Мерца.

Вступ Україны до Европской унії в році 2027, як собі то представльовав презідент Зеленьскый, подля німецького канцеларя не є можливый. Значіть, Мерц то повів іщі твердше. Пояснив, же кажда країна, котра хоче стати частьов Унії, мусить сповнити Копенгаґеньскы крітерії, што є процес, котрый тырвать дакілько років, і же Унія може Україну помаленькы ку членству приближовати, але скоре приступліня просто не буде.

То так дакус проблема про Зеленьского, бо безпечностны ґаранції мали подля нього два стовпы. Першый є покровительство Споєных штатів Америкы, другым членство в Унії, котре хотів досягнути до року 2027.

О покровительстві Споєных штатів, і о тім, ці оно буде штось варте, в сітуації, коли видиме, же в Білім домі сідить чоловік, якый денно травматізує нелем властных жытелів але цілый світ, а нихто не знать, што повість або зробить зарань, днесь можеме доста похыбовати.

Навеце, уж давно є ясніше як сонце, же дяка прияти Україну до Североатлантічной аліанції не є, а якбач ани не буде. То, окрем іншого, так само было в арзеналі Зеленьского, сам уж од споминаня такой верзії будучности одышов.

Но іщі все ту были приповідкы о скорім вступі до Унії, чім сама Унія властно обдурьовала жытелів Україны.

Днесь уж то не є лем Орбан, котрый радікално стоїть проти того, жебы Укаїна вступила до Унії. Поступно і іншы політіци почінають быти реалістами, котры перестали бісідовати о скорім вступі. Лемже такым золотым клинцьом суть аж высловы Фрідріха Мерца. Слова канцеларя країны, котра вєдно із Франційов суть мотором Унії, і она буде фунґовати лем довтогды, покля то Паріж і Берлін іщі буде інтересовати, не мож брати легковажно.

Фрідріх Мерц просто повів прямо тото, што ся дотеперь бісідовало максімално в кулоарах, а властно повів правду. Война не є вольный тікет, котрый ті забезпечіть, же не мусиш нич, а скоростьов світла будеш меджі нами.

Могли бы сьме Мерца похвалити, же не хоче далше обдурьовати україньскых гражданів, і повів, як то справды буде, покля Україна буде хотіти здобыти членство. Но на другім боці треба на то смотрити і крітічно.

Україна стала кандідатьсков країнов в юні 2022-го року, значіть майже чотыри рокы зохабили Зеленьского бісідовати властным гражданам, як вшытко і скоро буде супер. Нашто і кому тото было добре? Но а не забывайме на Мерцом спомянуты Копенгаґеньскы крітерії. Файно їх припомянути Україні, же їх мусить сповняти. Але найліпше было бы, кебы Унія і реално смотрила на то, як Київ тоты крітерії выповнює.

Майже чотыри рокы кандідатьска країна, котра має выповняти крітерії, меджі котрыма суть і права народностных меншын, ани палцьом не рушыла в ділі прав, котры Київ сперать Русинам.

Із послідніх высловів єдного із найважнішых політіків Европской унії мож собі зробити дві основны заключіня.

По перше, теперішні позіції Фрідріха Мерца суть доста нескоров одповідьов на україньскы сны о скорім приступліню. По друге, Европа бы іщі од декларатівности мала перейти ку конкретности. Кедь ся будеме бавити о Копенгаґеньскых крітертіях, пак хочеме видіти конкретны резултаты в каждій єдній области.

Про тых, котры мають проблему із чітаньом а порозумліньом чітаного тексту: Сповніня Копенгаґеньскых крітерій має значіти права про Русинів.

Статя была написана як коментарь „Вступне до контроли“ лемківского радія lem.fm. Жрідло фотоґрафії: AI/ChatGPT.