Сумар дня на 2. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 2. лютого/фебруара 2026 р.

Новый систем біциґльовых трас на західній Лемковині

Ґміна Крениця отримала дофінасуваня, што позволит жытелям і туристам на біциґльову прогульку через дакотры села західньой Лемковины. Інформувал о тым бургомайстер Крениці, Пьотр Рыба. Середкы будут схоснуваны на будову систему роверовых трас, што получат ґміну Крениця з ґміном Лабова. Пут буде ішол од Крениці, через Мохначку Выжню, дальше повітовом дорогом на Перун, пак зъізд до Чырной, новом стежком до Перункы, Бересту і Полян, аж до повітовой дорогы на Котів і Лабову.

Фамелийны варштаты з сериі «На Лемківскым Пути»

Ближат ся дальшы подіі товаришучы выставі «Формы присутности. Штука Лемків/Карпатскых Русинів», яка презентувана єст в Державным Етноґрафічным Музею в Варшаві. Уж в найблизшу неділю 8. лютого/фебруара Музей просит до участи в фамелийных варштатах з сериі «На Лемківскым Пути», з темом «Лемкы/Карпатскы Русины». Участникы занять выконают декорацийны імачы на фотоґрафіі з натуральных материялів навязуючых до краєвиду Лемковины. Пак зроблят до них знимкы з выставы. Варштаты сут направлены на діти од 5 рока жытя в товаристві дорослого. Стрічы в рамках цикю «На Лемківскым Пути» будут проходити каждого місяця, ведучы темы дальшых стріч то: горы, церков, ліс і хыжа. Білеты до придбаня на сайті Державного Етноґрафічного Музею в Варшаві.

Тематичны опроваджаня по выставі «Формы присутности. Штука Лемків/Карпатскых Русинів»

На тот місяц Етноґрафічный Музей в Варшаві зрыхтувал тіж дальшы тематичны опроваджаня по выставі «Формы присутности. Штука Лемків/Карпатскых Русинів». В віторок 10. лютого/фебруара одбуде ся перше опроваджаня по выставі в польскым жестовым языку. Поведе го Наталия Сюхта. О ден, в середу 11. лютого/фебруара пройде тематичне опроваджаня, што буде присвячене памяти. Поведе го куратор выставы др Михал Шымко. Дальше опроваджаня одбуде ся в неділю 15. лютого/фебруара і буде присвячене творчости Епіфана Дровняка – Никыфора та його значыню для лемківской культуры і істориі штукы. Опроваджаня поведе Аліция Міронюк Нікольска, кураторка выставы ”Никыфор. Маляр над малярами”. В остатній ден місяця, в суботу 28. лютого/фебруара буде чергове опроваджаня пн. ”Іконы Лемковины”, якє поведе Аґнєшка Клещ. Окрем того Музей заплянувал тіж выклад на тему Акциі ”Вісла” і єй наслідств для лемківской соспільности. Выклад выголосит проф. др габ. Ґжеґож Мотыка – директор Войскового Історичного Бюра, працівник Інституту Політичных Студий Польской Академіі Наук. Дрібниці о вшыткых подіях находят ся на інтернетовым сайті Етноґрафічнного Музею в Варшаві.

«Малопольскій білет на зимовы вакациі»

В Малопольщы зачали ся зимовы вакациі. І в тым році малопольскє воєвідство рішыло вернути з акцийом «Малопольскій білет на зимовы вакациі». До 15. лютого/фебруара тр. діти і молодіж можут подорожувати вшыткыма реґіональныма потягами курсуючыма на терені малопольского воєвідства за символичну злотівку. Оферта обовязує в складах обслугуваных Малопольскыма Желізницями, Шлезскыма Желізницями і Польреґіо. Оферта діє тіж в автобусах Малопольскых Довозовых Леній, з вынятком одтинка Мушына-Попрад Татры. Окрем того можливы сут тіж выбраны получыня выходячы поза границі воєвідства. Білеты сут цілоденны і закладают неограничене чысло переіздів. Сут доступны до придбаня в касах і в мобільных аплікациях.