В Пряшові припомянули собі 20 років од смерти митрополіты Николая

Як інформовало Пресове одділіня Уряду Пряшівской православной єпархії, Його Блаженость Ростислав, архієпіскоп пряшівскый і митрополіта чеськых земель і Словакії одслужыв 1-го фебруара 2026-го року, коли в літурґічнім календарі припоминала собі Церьков Неділю мытаря і фарізея, в Катедралнім соборі святого князя Александра Невского в Пряшові торжественну літурґію, котра была присвячена спомині на 20-ту річніцю одходу на вічность архієпіскопа пряшівского і митрополіты чеськых земель і Словакії – владыкы Николая.

Голова Православной церькви в чеськых землях і на Словакії одслужыв літурґію вєдно із настоятельом катедралного собору митрофорным протоєрейом Михалом Швайком, єрейом Міланом Петриском і архідіаконом Максимом Дурілом.

У своїй проповіді митрополіта Ростислав підкреслив, же образный приклад о мытарьови і фарізейови нам шторік припоминать, же приближує ся свята Чотыридесятніця, єден із найважнішых періодів церьковного року. Так само припомянув слова святого апостола Павла із Писма Євреям: „Памятайте на тых, котры вас вели, і котры вам проповідали слово Боже. Смотьте на конець їх жывота, і наслідуйте їх віру.“

„Про многых із нас быв такым чоловіком довгорічный архієпіскоп пряшівскый і митрополіта чеськых земель і Словакії владыка Николай. Позавчара минуло двадцять років од його одходу на вічность, но час не змазав спомину на нього в сердцях тых, котры го знали і любили,“ повів владыка Ростислав.

„Быв то чоловік, котрый цілый жывот оддав Хрістови і Його Церькви. Хоць носив імя святого Николая, в день праздника котрого народив ся, його понад чотыридцятьрічне єпіскопске діяня припоминать жывот пророка Мойсея, котрому бог звірив про свій выбраный народ нелегке посланя. Стояв на челі Пряшівской православной єпархії, а пізніше і цілой нашой містной Церькви в складнім періоді, котрый выжадовав много духовных сил, діпломації,“ продовжовав сучасный голова православных в Чеській републіці і на Словакії.

„Конець комунізму, наступліня демокрації, будованя новых храмів і многы далшы общественны і церьковны вызвы про нього стали принагодов, і про нас остатніх прикладом, як мож проявити щіру віру в Бога, довіру в його провиджіня, і вірность в службі Церькви аж до послідньой хвілі. Зато днесь окремым способом дякуєме Богу за жывот і діяня владыкы Николая, і приносиме молитвы за одпочінутя його душы. Най му Господь дарує обыстя меджі справедливыма,“ повів владыка Ростислав у проповіді.

Митрополіта Николай

Митрополіта Николай, світьске імя Николай Коцвар (19. 12. 1927 р. – 30. 1. 2006 р.), быв родаком із села Ганіґовці, Сабіновского окресу.

Богословскы штудії абсолвовав у Православній семінарії в Празі. У 1950-ім році быв призначеный адміністратором парохії в Никловій (Микулашова), в окресі Бардейов. О чотыри рокы пізніше став шпірітуалом на Православній богословскій факулті в Пряшові, і посланый быв на штудії до Москвы на Духовну академію, де здобыв тітул кандідата богословскых наук.

У 1964-ім році быв призначеный адміністратором Пряшівской православной єпархії. Як вдовець став монахом. За пряшівского єпіскопа быв выбраный у 1965-ім році. Быв довгорічным намістником митрополіты Дорофея, і по його смерти став митрополітным адміністратором Православной церькви в чеськых землях і на Словакії.

Рішіньом Священного сіноду Православной церькви в Чехословакії владыка Николай став у 1987-ім році архцієпіскопом. На X. Містнім сеймі Православной церькви быв 14-го апріля 2000-го року выбраный за митрополіту Православной церькви в чеськых країнах і на Словакії, в тім самім році быв торжественно інтронізованый. Під його веджіньом по політічных змінах із 1989-го року Православна церьков збудовала 78 новых храмів.

Митрополіта Николай є похованый в Катедралнім соборі святого князя Александра Невского в Пряшові.