Лемко в Раді Будучности – на запрошыня Премєра Туска

«Тото, што днес видиме, утверджує нас в переконаню, што Польща може быти єдным з найліпшых місц на світі для розвитку господаркы і інноваций» – повіл Премєр Польской Республикы Дональд Туск вчас подіі покликаня Рады Будучности, до котрой вошли представникы світа бізнесу і наукы.

Серед запрошеных до спілпрацы нашол ся Ярослав Королівскій, родак з Ганчовы – наковец, проґраміста, бізнесмен і інвестор.

О покликаню Королівского повідомили тіж власти ґміны Устя Рускє. «З гордістю інформуєме, што Пан Ярослав Королівскій, выхідця з Ганчовы в ґміні Устя Рускє, был покликаный Премєром Дональдом Туском до Рады Будучности. Покликаня до того орґану явит ся доказом узнаня для дотеперішніх осягнінь та компетенций Пана Ярослава Королівского. Сердечно ґратулюєме і желаме плідной працы для розвитку Польщы» – подают.

Подія покликаня Рады Будучности одбыла ся в Варшаві 10. лютого/фебруара. До Рады вошло 19 осіб – в тым Міністер Фінансів і Господаркы Анджей Доманьскій, якій буде вюл працами.

«Хотіл єм барз подякувати вшыткым, котры рішыли ся творити Раду Будучности. То люде барз заняты, якы не нарічут на брак успіхів в науці, в бізнесі, в творіню цілком новой реальности. То люде, якы здобывали тіж для Польщы космос, што знают продукувати найбарже цінены днес сателіты» – повіл Дональд Туск.

Рада Будучности буде дорадчым орґаном Прємєра, готуючым рекомендациі діянь і рішынь, якы мают підтримувати дальшый розвиток Польщы.

Подля премєра в остатнім часі Польща стала ся «тренді», а позитивны уявліня о державі штораз частійше находят потверджыня в реальности. То як раз ту істнувати має реальна шанса на ліпшу будучніст. «Жыєме в єдным з найліпшых місц на Земли і то предовшыткым завдякы активности, креативности і працовитости люди. Але відомо, што щестя є потрібне, кєд хоче ся осігати успіхы, а щестя сприят ліпшым» – бесідувал Туск.

Окрем Ярослава Королівского, презеса і спілоснователя компаніі Synerise – єдной з найбільше заавансуваных технолоґічных фірм в Европі, до Рады Будучности вошли такы особы як Славош Узнаньскій-Віснєвскій (Астронавта Европейской Космічной Аґенциі, першый Поляк в істориі, што перебывал на Медженародній Космічній Стациі), Стефан Баторы (основатель аплікациі Booksy) ци Томаш Конік (презез Deloittе в Центральній Европі, ініциятор Фундациі Deloitte в Польщы).

Ярослав Королівскій, окрем того, што є головным директором (CEO) компаніі Synerise, єст тіж дослідником і выкладовцьом Технічного Університету в Кракові (AGH). Од квітня/апріля 2020 р. был спілвластительом футбольовой компаніі Вісла Краків, а актуально є векшыновым акцийонером і презесом клюбу. Являт ся приватным спонсором локальных клюбів і ініциятив.

Компанія Synerise творит опроґрамуваня, якого основом є штучна інтеліґенция (АI) та big data.

Быват присутный і в лемківскым середовиску. Заохочуєме одслухати архівне інтервю, якє Ярослав Королівскій дал нашому радию в 2020 р.