Вмер русиньскый писатель Іван Завадяк

Як інформовав голова Русиньского културолоґічного клубу Юрій Шиповіч, в середу 18-го фебруара 2026-го року вмер русиньскый писатель, прозаік Іван Завадяк. Вмер у віці 86 років.

Хоць Завадяк почав писати аж недавно, у высокім віці, свойов творчостьов і продуктівностьов належав меджі найінтереснішых сучасных русиньскых писателів на Підкарпатю.

Народив ся Іван Завадяк 24-го септембра 1939-го року в селі Новоселиця, на Підкарпатю, до многодітной селяньской родины. Абсолвовав штудії на Хустьскім културно-освітнім технікумі, пак на Ужгородьскій державній універзіті.

Понад 55 років працовав у різных роботах в културній, освітній, общественно-політічній области, ці в области правной охраны, але і у выробі.

Іван Завадяк почав писати аж в пензійнім віці. Як сам споминав, стало ся то так, же ся му вночі на Рождество 2017-го року приснила його покійна мамка, і попросила го написати книжку.

Завадяк быв єдным із редакторів книгы історічно-културолоґічных нарисів під назвов Верховина: Волівщина ‒ Міжгірщина із 2017-го року.

Свої прозаічны творы на русиньскім языку почав публіковати наперед в журналі Отцюзнина, і то такой в 2017-ім році. Пак його творы знайшли ся і в літературных зборниках Алманахах днешньої русинської літературы.

Є автором біоґрафічной трілоґії, котра почала романом у новелах Брызґы споминӱв из дітвацтва із 2019-го року, продовжовала трьома повістями, зобратыма довєдна під назвов Выпровбалованя любовльôв із 2021-го року, і закінчіла ся книгов Налице тай нарубы, котру Завадяк выдав у 2024-ім році.

Якраз послідню споминану книгу авотор презентовав точно перед роком, у фебруарі 2025-го року, в Ужгородьскій публічній бібліотеці.

„Темов того выданя стали явны і тайны аспекты совітьского періоду в жывоті як автора (котрому, подля його слов, і самому пришло быти шрубов у совітьскій машыні), так і краю,“ інформовала втогды бібліотека.

Nа презентації втогды бісідовали Михаіл Белень – русиньскый художник, скулптор, ґрафік, дале літературознатель Іван Сенько, Михаіл Зан, якый написав і спредслово до книгы, Анна Меґела, яка робила коректуру выданя, брат автора Михаіл Завадяк ці Юрій Шиповіч.

Похоронны обряды за Іваном Завадяком одбудуть ся в ся в пятніцю 20-го фебруара 2026-го року. Вічная память!