Высокопреосвященый Йона на навщіві в США. Навщівить Словаків і Русинів у діаспорі

Як інформовала Пресова канцеларія Конференції єпіскопів Словакії (TK KBS), в днях 23-го фебруара аж 10-го марца 2026-го року Высокопреосвященый Йона Максим, пряшівскый архієпіскоп і митрополіта, голова Ґрекокатолицькой церькви sui iuris на Словакії, абсолвує пастырьско-робочу навщіву в Споєных штатах Америкы.

Цільом навщівы є посилнити духовны звязы із словацькыма а русиньскыма віруючіма в діаспорі, проглубити співпрацу із містныма єпіскопами, і підпорити єдность Церькви в часі общественных і церьковных выкликів. В проґрамі має богослужіня, стрічі із представителями Церькви, і особны розговоры із віруючіма.

„Приходжу меджі нашых віруючіх, жебы єм їх повзбудив у вірі і упевнив їх, же Церьков на Словакії на них памятать. Єдночано мам тугу проглубити односины із містныма пастырями, і глядати новы можливости співпраці в службі євангелії,“ повів владыка Йона перед одходом.

За його словами є важным, жебы і посередництвом стріч будовала ся взаємна довіра і єдность меджі партікуларныма церьквами.

Свій проґрам має у веце америцькых штатах, де буде служыти в храмах, котры належать під русиньску Піттсбурзьску митрополітну церьков sui iuris. В неділю 1-го марца стрітить ся в Піттсбурзі із Высокопреосвященым владыком Вілъямом Скурлом, піттсбурзьскым архієпіскопом і митрполітом, вєдно одслужать і архієрейску літурґію.

В понедільок 2-го марца у Вашінґтоні стрітить ся кір Йона із представителäми Конференції католицькых єпіскопів Споєных штатів, наслідно в Ню Йорку стрітить ся із ню-йорьскым римокатолицькым архієпіскопом Ронадлом Гіксом, а пак і з Йосефом Вілъямом Тобіном, римокатолицькым архієпіскопом Неварку.

Пастырьска навщіва Споєных штатів завершыть ся в неділю 8-го марца в Пассаік одслужіньом утрені і архієрейской літурґії в Катедралнім соборі святого Михаіла Архістратига.