Сумар дня на 5. марця 2026 р.

Приносиме вам сумар медияльной ґрупы ЛЕМ.фм+ на ден 6. марця 2026 р.

Промоция лемківского словника

20. марця на Ягайлоньскым Університеті одбуде ся стріча з проф. Оленом Дуць-Файфер і членами словникового ансамблю, в рамках котрой буде запрезентуваный «Контекстуальный словник лемківского языка». Стріча має быти нагодом до дискусиі при участи проф. Мацєя Рака і проф. Генрика Фонтаньского. Авторы словниковых госел будут оповідати о ідеі і працах над словником. В рамках проґраму промоциі публикациі одбуде ся выступ ансамблю Лада і музичного дуету Дариі Кузяк та Ольгы Стариньской. Вступне на подію дармо. Стріча одбуде ся в Collegium Maius. Початок о 15:00 год. На подію просят Ягайлоньскій Університет, Выдавництво Академіцка Книгарня, в рамках котрого словник ся вказал (з сериі Scripta Lemkoviana) і Музей Ягайлоньского Університету.

Карпатска писанка 2026

Выгорлятскій Музей в Гуменным во спілпрацы з Окресном Орґанізаційом Уніі Жен Словациі і того рока зорґанізувал дальшый уж річник, 34. Медженародной Конкурсовой Выставы під назвом Карпатска писанка 2026. До конкурсу, в котрым мож писанкы робити ріжныма, веце і меньше знаныма техніками крашыня, од стародавных аж по тоты найновшы, залучыли ся десяткы писанкарів. Святочный вернісаж Карпатской писанкы 2026 разом з выголошыньом результатів конкурсу, в рамках котрого оцінювала писанкы медженародне фахове жырі, одбуде ся днес в Концертовій сали Выгорлятского Музею в Гуменным. Як інформувал музей, конкурсовы колекциі писанок од веце як 50 авторів зо Словациі і заграниці будут выставлены до 10. квітня/апріля. Музей приготовлює і Ярмак писанок, на котрым писанкарі зо Словациі будут своі творы заінтересованым продавати в просторах Выгорлятского Музею. Тота подія одбуде ся 29. марця.

lemko.tools уж доступне

Лемківскій язык входит в світ модерных технолоґій – Стоваришыня «Руска Бурса» в Ґорлицях одкрыло плятформу lemko.tools. Творці вірят, же лемківскы языковы нарядя lemko.tools злегшат працу з лемківскым языком, поможут го популяризувати і одкрыют новы можливости його творчого выкорыстаня. То ефект парунадцетьох років працы шырокого ансамблю, але і доробок вельох поколінь: писменників, артистів, журналистів, тлумачів і вшыткых хоснувателів языка. Получыня той дідовизны з модерныма технолоґіями, в тым машыновым вчыньом, позволило створити заавансувану плятформу оферуючу нарядя до вчыня, тлумачыня, транскрипциі, синтезы бесіды і креативной експлорациі лемківского языка. Основаня lemko.tools не было бы можливе без «Контекстуального словника лемківского языка» під редакцийом проф. Олены Дуць-Файфер та базы награнь і одповідаючых ім текстів радия лем.фм. За альґоритмы і машынове вчыня систему одповідат проф. Павел Малецкій. Заохочаме до хоснуваня!

Ремонт будинку ПТТК

В Ґорлицях зачал ся ремонт будинку Реґіонального Музею ПТТК. Роботы будут обнимати цілковиту реновацию елевациі обєкту. В рамках того одбуде ся одтворіня давного выгляду сґраффіто (sgraffito). Інвестиция єст реализувана через Ґорлицкє Товариство Соспільного Будівництва. Фінансуваня прац походит м.ін. з середків міста. Згідно з пляном працы завершат ся до кінця квітня/апріля т.р. В звязку з ремонтом змінила ся орґаніция руху в тій околици, зато шоферы авт повинны мати позір.