В Орадеї одбыло ся засіданя Світовой рады Русинів

Як про аґентуру Рутенпрес інформовав Іван Лікар, в суботу 7-го марца 2026-го року в просторах Філолоґічной факулты Орадейской універзіты в Орадеї, Румунія, одбыло ся 3-тє засіданя Світовой рады Русинів – выконного орґану Світового конґресу Русинів у меджіконґресовым періоді.

Участных привітали Джафер Дінчер – директор Одділіня меджіетнічных односин Румунії, представителі Бігарьской жупы, котрой Орадеа є адміністратівным центром, представителі міста, як і депутат Парламенту Румунії за Русинів Юліус Фірцак, председа Світового конґресу Русинів Штефан Лявинець, які і домашній председа Културного товариства Русинів Румунії Ґеорґій Фірцак.

В рамках публічной части засіданя Світовой рады Русинів (СРР) одбыла ся презентація книгы Франціска Оскара Ґала під назвов Русиньска апокаліпса.

В рамках непублічного засіданя СРР бісідовало ся о тім, же ся рихтує публікація, котра буде присвячена 35-ій річніці основаня Світового конґресу Русинів (СКР), што одбыло ся в місяці марец 1991-го року в Меджілабірцях. Якраз там бы мала быти і презентована нова книга при нагоді півокруглой річніці.

Членьскы орґанізації СКР мають до половины апріля загнати так само пропозіції на Премію Василя Турока-Гетеша, і на Націоналну премію за русиньске уменя імени Івана Манайла Pro Arte Ruthenorum за 2026-ый рік.

Членове СРР окрем іншого презентовали на засіданю і план роботы на тот рік своїх орґанізацій. В Орадеї одбыло ся і 5-те засіданя Світовой рады Світового форуму русиньской молодежи.

В просторах універзіты одбыв ся і културный проґрам, кедже 3-го марца припомянули сьме собі День Русинів Румунії.

Фото: Іван Лікар, Рутенпрес.