Календар подій Стоваришыня Лемків в 2026 році

Стоваришыня Лемків – найстарша повыселенча лемківска орґанізация, діюча од 1989 р., протягом 2026 рока зорґанізує пят подій. Перша з них одбуде ся уж о два місяці.

Найважнійшы акциі орґанізуваны Стоваришыньом проходят все в другій половині рока, але рыхтуваня до дакотрых з них уж тырвают.

В тым році, окрем шторічных подій, одбуде ся і креницкє Бієнале. Календар представлят ся слідуючо:

• 23.-24. мая – 13. Бієнале Лемківской/Русиньской Культуры – RuthenAle в Креници (орґанізує креницкій Кружок СЛ);
•  31. липця/юлия – 2. серпня/авґуста – 46. Лемківска Ватра на Чужыні в Михалові;
•  19.-20. вересня/септембра – 32. Лемківска Творча Осін (орґанізує креницкій Кружок СЛ);
• жолтен/октобер (точна дата не єст іщы знана) – 34. Стрічы з Лемківском Культуром в Ґожові Великопольскым (орґанізує ґожівскій Кружок СЛ);
• 24.-25. жолтня/октобра – 20. Стрічы Трьох Поколінь з Лемківском Культуром в Пшемкові і Любіні (орґанізує пшемківскій Кружок СЛ).

До того списку треба додати шторічный Ден Русинів в Польщы, якій все єст празднуваный 5. грудня/децембра – 108. річниця віче во Фльоринці, якє дало початок Рускій Народній Республиці Лемків.

В рамках річной діяльности Стоваришыня Лемків выдає двомісячник «Бесіда», якій безперерывно выходит од 1989 р. В рамках выдавничой діяльности вкаже ся «Лемківскій Річник 2026», котрый як каждый рік приведе основны річниці і ювілеі з русиньской істориі. Окрем того, в поєдных Кружках Стоваришыня Лемків можут быти орґанізуваны і другы акциі.

В основну діяльніст Стоваришыня Лемків вписує ся і діяльніст двох ансамблів. То Лемківскій Ансамбль Пісні і Танця «Ластівочка» з Пшемкова і діюча при ним діточа ґрупа «Ластівчата». Пшемківскій Кружок СЛ реализує тіж річный проєкт «Наша світлиця».

Вшыткы проєкты реализуваны сут завдякы дотациі Міністра Внутрішніх Справ i Адміністрациі.