Сумар дня на 26. марця 2026 р.

Приносиме вам сумар медияльной ґрупы ЛЕМ.фм+ на ден 26. марця 2026 р.

ТАД святкує 80 – літя діяльности

Премєром пєсы під наголовком «Бідов о землю!», котра є заплянувана на заран, єдиный професийональный русиньскій театр во світі – Театр Александра Духновича (ТАД) в Пряшові вертат ся ґу першій премєрі той театральной сцены. Тота одбыла ся 2. марця 1946 р., коли попередник ТАД – Украіньскій Нацийональный Театр, основаный в 1945 р., одпремєрувал першу пєсу під назвом «Ой, не ходи, Грицю, тай на вечорниці». Розділів медже першом премєром перед 80. роками і том ювілейном є веце. Наприклад і в тым, же тепер ся буде грати по русиньскы. Директор ТАД Мариян Марко премєру характеризувал як «черешнічку на торті», кєд же 27. марця, коли ся святкує і Світовый Ден Театру, є приготовленых веце дальшых активности при нагоді 80. річниці Театру. Дополудне підут оддати чест основательови Театру Іванови Грицьови-Дуді до його гробу на цмонтери в Сабинові. Рыхтує ся і одкрытя памятной таблиці Александрови Духновичови на будинку ТАД. По вечерній премєрі сут запрошены гості на святочну гостину. Святкуваня 80. річниці Театру буде проходило під покровительством председы ПСК Міляна Маєрского. Як раз край є заряджувательом ТАД од 2002 р.

Найліпшы книгы Прашівского Самосправного Краю

Пряшівскій Самосправный Край (ПСК) вєдно зо своіма реґіональныма бібліотеками зас глядат найліпшы книгы повязаны з реґіоном. Як інформувало Одділіня комунікациі ПСК, девятый річник літературного конкурсу «Книга рока ПСК» принесе оцінку найбарже інтересуючых публикаций выданых в попереднім році. Авторы книжок, котры были выданы влони, можут залучыти ся до уж традицийного конкурсу «Книга рока ПСК 2025». Як раз в тых днях почал його девятый річник. Каждого рока го выголошуют ПСК і реґіональны бібліотекы краю в Пряшові, Бардийові, Гуменным, Левочы, Попраді, Старій Любовни, Свиднику і Воронові на Топльом. Термін на номінациі книжок є до 30. квітня/апріля 2026 р. До конкурсу мож номінувати друкуваны вязаны або брошуруваны публикациі з приділеным ISBN в словацкым языку, але і книгы в русиньскым та украіньскым языках.

Владыка Юрий нагородил священників вроцлавско-щеціньской єпархіі

В минулу суботу в православній катедрі во Вроцлаві одбыли ся великопістны реколекциі духовенства вроцлавско-щеціньской єпархіі. Вчас Божеской Літургіі владыка Юрий нагородил з нагоды надходячой Пасхы правом ношыня митры о. Юрия Малиша (актуального пароха Кожухова і Липин, а в минулости долголітнього пароха Зимной Воды і Михалова) та о. Славомира Сороканича, пароха в Студзьонках. Правом ношына креста з прикрасами был нагородженый о. ігумен Спіридон Кузяк та о. Ігор Габура, парох з Самбожа. Правом ношыня палиці был одзначеный парох Ґожова Великопольского о. Фома Мендрицкій. Золотый крест отримал тіж о. Олексий Адамчук, якій послугує в украіньскоязычній парохіі на вроцлавскых Пясках. Вчас богослужыня співал катедральный хор під дириґентуром Давида Дубеца.

Долуч до орґанізаторів Лемківской Ватры на Чужыні в Михалові

Орґанізаторы Лемківской Ватры на Чужыні просят до спільного творіня ближучой ся 46. Лемківской Ватры на Чужыні, яка одбуде ся в Михалові на Нижнім Шлеску в днях 31. липця/юлия – 2. серпня/авґуста. Мож діяти в выбраным ансамбли: артистичным – при проґрамі і спілпрацы з артистами, промоцийным – творячы зміст на соспільны медиі, та спортовым – помагаючы при рыхтуваню вартровиска. Заінтересуваны можут писати на майль: watramichalow@gmail.com. Орґанізатором Лемківской Ватры на Чужыні єст Стоваришыня Лемків.