Руска Бурса на загальным зобраню. Присутны взяли участ в варштатовым школіню.

В Ґорлицях, 28. марця 2026 рока, зышли ся члены Стоваришыня «Руска Бурса» на загальным зобраню, на якым підсумували діяльніст общества за влонишній рік, накрисляючы тіж текучы і будучы задачы та выбраючы новы власти орґанізациі.

На самым початку ведуча стоваришыня, Наталия Малецка-Новак, зачынаючы зобраня, попросила вшыткых присутных пошанувати минутом тишы памят Антоніны Коцур (1947-2025), долголітньой членкыні і єдной з тых осіб, котры в 90. роках ХХ ст. рішыли реактивувати по долгым періоді завішыня тоту важну для лемківской спільноты орґанізацию – Стоваришыня «Руска Бурса».

Справописы і формальности

Необхідным елементом того рода стріч єст выполнити правно-формальны стороны свойой діяльности. Зато бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови.

Обзераючы обшырну презентацию, яку представила ведуча, не мож не достеречы, же Руска Бурса ся фурт розвиват, пошырят обшыр свойой діяльности, так ґеоґрафічно, як і мериторично. Окрем того не заперат ся на спілпрацу лем з локальныма інституциями. Уж тепер, окрем русиньского кругу цілой Карпатской Руси, партнерами общества сут орґанізациі з цілой Европы, аж і світа, а іх кількіст прибыват.

Днес, Руска Бурса то орґанізация, яка фурт занимат ся розвитком свойой інфрастуктуры, веде выдавничу діяльніст, сміло входит в дослідничы проєкты, орґанізує культуральны акциі, має свою величезну бібліотеку і являт ся лідером лемківскых/русиньскых медий, чого приміром єст Медияльна Ґрупа ЛЕМ.фм+ (в виді синерґіі діяня радия, порталю і подкасту).

Принявшы і проголосувавшы справописы, выбраный был новый заряд общества, на котрого челі, рішыньом присутных, дальшый уж раз станула Наталия Малецка-Новак. Полный склад заряду до наступного загального зобраня остає подібный. Разом з ведучом дополняют го Олена Дуць, Павел Малецкій, Анна Масляна, Андрий Трохановскій і Даміян Трохановскій.

Актуальне і  будуче

При роботі над формально-правныма справами, бурсакы бесідували тіж о текучых і плянуваных активностях. А то не лем о актуально веденых ґрантах і проєктах, але тіж о тых, што іх мало бы ся реализувати о рік, о три, ци о пят-десят років.

По бесіді, выміні опіній і спільным полуденку, вшыткы заняли ся внутрішніма школіньовыма варштатами, о результаті котрых надієме ся поінформувати в близшым, або дальшым будучым.