Вмерла Антоніна Коцур (1947-2025). Вічна Ій памят!

З жальом інформуєме, што 27. квітня/апріля 2025 р., на 78 році жытя вмерла Антоніна Коцур, долголітня членкыня Стоваришыня «Руска Бурса» в Ґорлицях. Была єдном з парунадцетьох осіб, котры в 90. роках ХХ ст. рішыли реактивувати по долгым періоді завішыня тоту важну для лемківской спільноты орґанізацию. Серед членів основательского комітету Руской Бурсы был так само муж покійной, бп. Михал Коцур, народный артиста, соспільник.

Покійна Антоніна Коцур, з д. Хомяк, вродила ся 28. листопада/новембра 1947 рока. Єй родове гніздо выводит ся з Вафкы. Мала три дівкы: Лідию, Анну і Орину. Перед десятьома роками вмер муж покійной – бп. Михал Коцур. Од 80. років ХХ ст. спілтворили православну спільноту в Ґорлицях. Цілом родином анґажували ся в діяня і жытя парохіі так само як і соспільного жытя Лемків.

Бп. Антоніна Коцур в роках 1991-1993 была членкыньом Заряду Стоваришыня «Руска Бурса» в Ґорлицях, в роках 1993-2001 полнила функцию секретаря, а в роках 2001-2003 засідала в Контрольній Комісиі. Долгы рокы вєдно з мужом опікували ся будинком і пляцом при бурсі. Ініциювали і орґанізували або спілорґанізували выбраны активности та подіі Стоваришыня «Руска Бурса» в Ґорлицях, як напр. початок і закінчыня шкільного рока для діти і молодежы, конкурсы і забавы для діти, розмаіты варштаты, орґанізували выставы фотоґрафіі, рисунку, ґрафік.

Бп. Антоніна Коцур свій свобідный час посвячала не лем на діяльніст в культурно-соспільній обшыри, але тіж на розвиваня свого артистичного таланту, подібні як єй здібны муж і дівкы. Занимала ся варштатовом ґрафіком, а творила головно в техніці монотипіі і сухой іглы. Єй роботы представляли предовшыткым природу. Была членкыньом Клюбу Штукы ім. Альфреда Длуґоша в Ґорлицях, брала участ в Ґорлицкых Салонах – дорічных выставах ґорлицкого плястичного середовиска. Єй роботы презентуваны были на выставах м.ін. в Ґорлицях, Лоси, Ждыни, Высовій, Завадці Рыманівскій і Дукли.

Парастас з чытаньом Псалтыря буде одслуженый в найблизшый четвер 1. мая в ґорлицкій православній катедрі св. Тройці о 18.00 год. Похорон зачне ся в пятницю 2. мая о 11.00 год. (того самого дня од 10.00 год. буде чытаня Псалтыря), пак Покійна спочне зо своім мужом на цмонтери в Ґорлицях.

Вічна Ій Памят!