Ярослав Королівскій в президентскій Раді Бізнесу

Кус більше як місяц тому інформували сме, што Лемко Ярослав Королівскій был покликаный Премєром Польской Республикы до Рады Будучности. В тых днях пришла ґу нам друга подібна віст – тым разом Ярослав Королівскій был попрошеный через Президента ПР Кароля Навроцкого до участи в Раді Бізнесу при уряді Президента Польской Республикы.

Подія переданя номінацийных актів одбыла ся 25. марця в Президентскым Палаци. Навроцкій в своім выступліню подякувал підприємцям за іх штоденну роботу для розвитку і економічного росту державы. Припомнул, што Польщу запрошено на тогорічный саміт ґрупы G20. Додал при тым, што успіхы тоты были можливы завдякы польскым бізнесменам.

«Предовшыткым хочу в символичный спосіб подякувати польскым підприємцям, якы рішали за остатніх 35 років о польскым економічным успіху. За тото, з глубины серця дякую, бо сила польской господаркы операт ся з єдной стороны на силі і працовитости польского світа працы, польскых працівників, люди, якы каждого дня тяжко роблят, а з другого богу – на інновацийности, підприємстві, даякым чутю і трудных рішынях, підниманых в світі бізнесу. Вы тоты рішыня піднимате каждого дня» – бесідувал Президент.