Сумар дня на 9. квітня 2026 р.

Приносиме вам сумар медияльной ґрупы ЛЕМ.фм+ на ден 9. квітня 2026 р.

Як розвивати лемківскій язык?

О тыжден, в пятницю 17. квітня/апріля в Рускій Бурсі в Ґорлицях одбуде ся стріча, котра посвячена лемківскому языкови пн. Як розвивати лемківскій язык? Вчыня, материялы і інспірациі. Презентация о можливостях і потенцияльных методах вчыня лемківского языка – ци то в рамках формальной едукациі ци поза школом. Стріча має быти нагодом до того, жебы подумати над тым, як творити і хоснувати материялы, котры реальні підперают розвиток языковых компетенций в нашым середовиску. Презентацию выголосят дослідникы Варшавского Університету і Університету Адама Міцкєвича в Познані: Аґнєшка Отвіновска-Кателяніц, Анна Щепаняк-Козак, Емілия Вонсікєвич-Фірлей і Томаш Віхеркєвич. Підчас прелекциі представлены будут інспірациі і практичны розвязаня, котры можут помочы в будуваню і підпераню языковых ресурсів – дома, в спільноті, культурі ци діґітальным просторі. Стріча орґанізувана єст в рамках медженародного проєкту Fosterlang.

Нова книжка: «Істория Підкарпатской Руси»

В половині марця на чешскій і словацкій книжковый рынок достала ся нова чешскоязычна публикация чешского історика Яна Ріхліка під назвом «Істория Підкарпатской Руси» (ориґ. Jan Rychlík: Dějiny Podkarpatské Rusi). Як пише ся в анотациі новой книгы, «Підкарпатска Русь, так само Закарпатска Украіна ци скорше Угорска Русь, належыт до реґіонів, котры притігают нашу увагу. Головно зато, же двадцетлітя Першой Чехословацкой Республикы была частьом спільной державы з чешскыма землями і Словацийом». Історик Ян Ріхлік, котрый є фаховцьом на переміны чехословацкых односин і чешску історию ХІХ і ХХ ст., том книжком дає чытательови перегляд істориі териториі Підкарпатской Руси од раннього середньовіку аж по сучасніст. Нова 360-сторонна публикация на першый погляд дає комплетный перегляд істориі териториі, котру называме Підкарпатска Русь. Ріхлік не інтересує ся темом Підкарпатя першый раз, но в новій книжці слідує тоту територию од протоісториі – найстаршых часів і першых населінь, аж по найновшу історию, включно такых дій як Евромайдан 2014 р. Історик ял ся описати і русиньскій рух по 1989 р.

Таксацийны працы приватных лісів

Ґміна Устя Рускє оприлюднила інформацию для властителів лісів, за приказом Ґорлицкого Старосты актуально ведены сут тереновы працы (таксацийны) повязаны з опрацуваньом плянів уряджыня лісів на рокы 2026-2036, якы належат приватным особам. Працы ведут выспециялизуваны робітникы. Проєкты будут доступны до публичного вгляду в них – в сідибі Уряду Ґміны Устя Рускє. О терміні і місци удоступніня документациі буде подана інформация в пізнійшым часі.

Христос Воскрес!

A на конец з нагоды ближучого ся праздника праздників за юлияньскым календарьом – вшыткым любителям нашых медий, зосередженых при Медияльній Ґрупі ЛЕМ.фм+ – хочеме желати пережыти тот великодній час з радістю, теплом і надійом на іщы ліпше будуче. Желаме Вам Спокійных Свят, а з нима смачной паскы і кобаскы, острого хріну, яєц, а предовшыткым глубокой віры в дане Воскресшым Христом вічне жытя. Того желат редакция ЛЕМ.фм і члены Стоваришыня «Руска Бурса» в Ґорлицях.