В Грабскім припомянули собі 50 років од смерти священомученика Василія Гопка

В неділю 10-го мая 2026-го року в Грабскім, роднім селі блаженого священомученика Василія Гопка, пряшівского помічного єпіскопа, одбыв ся архієпархіалный одпуст, котрым собі духовенство і віруючі Ґрекокатолицькой церькви на Словакії припомянули 50 років од смерти блаженого.

Як інформовав говорця Пряшівской архієпархії – отець Михал Павлишиновіч, торжество почало молитвов Святого ружанця, пак продовжовало Молебеном ку блаженому священомученикови Василійови.

Не глядав славу, вшыткых любив

Головным пунктом одпусту была Архієрейска літурґія, котру в церьковнославяньскім языку одправляв Высокопреосвященый владыка Йона Максим, пряшівскый архієпіскоп і митрополіта. Вєдно із ним служыв і Преосвященый владыка Курт Бурнетт, єпархіалный єпіскоп Пассаіку, США, котрый є в тім часі на робочо-душпатырьскій навщіві в Европі.

Вєдно із нима служыло понад 30 священиків. На торжестві брало участь і много монашок і віруючіх із шырокой околіці.

В проповіді голова Ґрекокатолицькой церькви на Словакії вказав на веце історічных фактів із жывота блаженого, причім выходив із свідоцтва єромонаха Атаназа Пекаря, ЧСВВ, котрый о владыкови Василійов повів тоты слова: „Владыка Гопко не глядав славу. Не домагав ся справедливости. Ани не жадав помстити ся. Вшыткых любив, вшыткым одпущав, і мав намагу послужыти своїй єпархії як помічный єпіскоп.“

Кір Йона акцентовав у проповіді жертвенну службу священомученика Василія по році 1968, коли наперек підломленому здоровлю повзбуджовав віруючіх, рукоположыв священиків і помагав при обнові церьковного жывота. Єдночасно быв простый, близкый ку обычайным людям, і мав способность нести терпіня в тихоті і довірі в Бога.

На кінцю торжественной літурґії приговорив ся і владыка Курт, котрый підкреслив особность владыкы Василія як мужа, котрый в тяжкых часах комунізму зістав вірный Божому слову і Святішому Отцьови, причім вказав на реалность днешньой добы, котрій не домінує жадне обмеджіня слободы ці віроісповіданя, але сама слобода, туга по моци і грошах робить людей іщі веце неслободныма і звязаныма.

Священомученик Василій

Блаженый священомученик Василій Гопко быв ґрекокатолицькым єпіскопом, мучеником комуністічного режіму і вызначнов особностьов Ґрекокатолицькой церькви на Словакії.

Народив ся 21-го апріля 1904-го року в Грабскім. Про свою віру і вірность Папови Римскому быв почас тоталітного режіму вязненый і переслідованый. Вмер 23-го юла 1976-го року. Вселеньскый Архієрей Йоан Павел ІІ. го выголосив за блаженого у 2003-ім році в Братіславі.

Ґрекокатолицька церьков собі його праздник припоминать 11-го мая, в день, коли прияв у 1947-ім році єпіскопску хіротонію. Його мощі суть уложены в бочній каплічці Катедралного собору святого Йоана Крестителя в Пряшові.

Фото: Мілан Дзурняк.