Почестным Громадянином Калушской Громады стал Федір Лабик

До списку Почестных Громадян Калушской Громады долучыл заслуженый лемківскій діяч серед Лемків на Украіні – Федір Лабик. Рішыня в тій справі приняла Калушска Містецка Рада.

Лабик был одзначеный за долголітню працу і вызначны досягніня, в тым на ниві лемківской культуры. «Пан Федір то чловек-архів, чловек-душа, чыя праца сохранят памят предків для нашых потомных. Його авторитет серед лемківской громады та мешканців Калущыны є беззаперечным» – пише ся на офіцийным сайті Калушской Містецкой Рады.

Лавреат вродил ся 20. марця 1937 р. в Святковій Великій, ясельского повіту. В 1945 р. родина Лабиків была выселена на радяньску Украіну – до сталіньской области (днес донецка). Од 1946 р. прожыват в Калушы, де остаточно оселяли ся Лемкы, якы втікали з далекого сходу.

В 1955 р. закінчыл калушску середню школу. В 1964 р. завершыл Калушскій Хімічно-Технолоґічный Технікум, а в 1971 р. – Івано-Франківскій Інститут Нафты і Ґазу.

Был депутатом Калушской Містецкой Рады другого демократичного скликаня. В 1955 р. был чемпіоном Калуша зо спортовой ґімнастикы.

Федір Лабик належыт до поколіня тых, якы уж на зачатку 90. років влучыли ся в одроджуваня лемківской культуры серед переселенців до Украіны. В 1992 р. был обраный ведучым Калушской Містецкой Громадской Орґанізациі Всеукраінського Товариства «Лемківщына».

Неодолга был за справом діяльности Лабика основаный хор «Студенка», якому в 1996 р. было надане званя «Народный самодіяльный фольклорно-етноґрафічный ансамбль пісні і танця». Лабик є доднес активным учасником колективу «Студенка», де співат, танцює, выконує вершы та гуморескы по лемківскы. Сам ансамбль дотепер творят в більшости іщы уродженці Лемковины, переселены як діти в 40. роках ХХ ст.

Был ініциятором і орґанізатором одкрытя в Калушы скульптурной композициі в памят переселенців з Польщы – в тым чыслі з Лемковины. Як єден з нечысленных діячів на Украіні дбат о красу лемківского языка, о тото, жебы бесіда, яку хоснуют Лемкы, была чыста, без влиянь з чужых языків. Сам прекрасно бесідує по лемківскы.

В 2025 р. Капітула Стоваришыня Лемків признала му Нагороду ім. Епіфана Дровняка – Никыфора – «за труд жытя одданый для лемківской культуры». Одобрал єй особисто вчас минулорічной 45. Лемківской Ватры на Чужыні в Михалові, де выступувал і колектив «Студенка». На подіі споминана была і 80. річниця траґедиі – выселінь Лемків на радяньску Украіну в 1945 р.