Сумар дня на 27. мая 2026 р.

Приносиме вам сумар медияльной ґрупы ЛЕМ.фм+ на ден 27. мая 2026 р.

Андрий Барна найліпшым ґаздом – ґратуюєме!

Лемківскій ґазда Андрий Барна остал лавреатом XXIX Турніру «Выборы Ґазды Рока 2026». Андрий Барна был найліпшый і. кєд іде о теорию і практику – выграл в тесті знаня і підчас практичных конкуренций. Турнір орґанізуваный был в Рацлавицях (в мєховскым повіті). Вшыткы участникы, якы бралу участ в тогорічным конкурсі, мусіли быти зрыхтуваны з модерного ґаздуваня, ходуваня звірят і еколоґічных управ рослин. Андрий Барна порадил сой найліпше на вшыткых етапах конкурсу, здобыл найвеце пунктів. Наштоден веде він ґаздівку в Кунковій, єст радным ґорлицкого повіту, а скорше засідал в раді ґміны Устя Рускє. В подіі участ брал малопольскій воєвода Кжыштоф Ян Кленчар та ґенеральна директор Малопольского Воєвідского Уряду в Кракові Люцина Ґайда. Крайанови Андрийові Барні – сердечні ґратулюєме!

Хто буде пропаґувал культуру в соспільных медиях?

Припоминаме, што іщы лем до заране до пілночы мож складати оферты в рамках додаткового набору на реализацию задач, котрых цілю є охорона, захованя і розвиток культурной достоменности нацийональных і етнічных меншын в Польщы. Дотациі признає Міністер Внутрішніх Справ і Адміністрациі. Як подано в оголошыню – преферуваны будут оферты задач, котрых головным результатом буде популяризация – в модерній діґітальній формі (особливо зо схоснуваньом соспільных медий) материялів авдийо або авдийовідео о высокых едукацийных приметах. Цілю короткых форм відео має быти популяризация знаня о меншынах і реґіональным языку і іх шырока дистрибуция та доступніст по закінчыню реализациі задачы. Інформация о признаню дотациі явит ся на сайті Міністра Внутрішніх Справ і Адміністрациі найпізнійше 3. липця/юлия того рока.

Бесіда з Кжыштофом Кжыжановскым

В четвер 28. мая о 19.00 год. одбуде ся чергова онляйнова Карпатска Стріча. Тым разом гостьом буде Кжыштоф Кжыжановскій, якій од 60 років вандрує з камером по цілых Карпатах. Єст автором парусот репортажів і документальных фільмів о соспільній, історичній, етноґрафічній темі і такых, якы тыкают справ вельокультуровости і етнічных меншын. 35 років працувал в TVP (польскій публичній телевизиі) як реализатор звуку, фільмовый оператор, режысер монтажу, репортер. Был тіж редактором, публицистом і выдавцьом реґіонального проґраму TVP Kraków. Єст лавреатом вельох фільмовых нагорід (напр. Медженародного Фільмового Фестівалю в Кошыцях ци Ужгороді), а за свою фільмову і журналистичну творчіст посвячену пропаґуваню вельокультуровости і підтримуваню етнінчной достоменности отримал нагороду Польско-Австралийской Фондациі Polcul. Як незалежный продуцент вырподукувал дальшы десяткы документів і репортажів, в тым вельо, котры тыкают русиньскых тем. Мотузок до стрічы найдете на сайті karpaccy.pl.

Варянка посмакувала!

Лемківска варянка посмакувала жырі конкурсу! В конкурсі Підкарпатскій Реґіональный Продукт «Страва Рока» выріжніня остримала традицийна лемківска поливка – варянка, яку зрыхтувала Ева Шымко з Етноцентра Коросняньской Землі. Страву доцінили за плеканя реґіональной кулінарной спадковины. Конкурс одбыл ся підчас ювілейной ХХХ едициі імпрезы «Смак і чар старых страв», котра одбыла ся в Блажовій. В подіі участ взяло понад 26 стоваришынь, кружків сельсых ґаздынь і індивідуальных выставців. Званя Стравы Рока здобыли голубці з пеца в грибовым сосі зрыхтуваны через Кружок Сельскых Ґаздынь в Красным в ряшівскым повіті. Орґанізаторы підкрисляют, што конкурс то головні промоция традицийных смаків і локальной кухні підкарпатского воєвідства.

Фот. gorlice24.pl