Сербска влада прияла акчный план односно народностных прав

Як інформує аґентура Рутенпрес, влада Републікы Сербія у четверь 28-го мая 2026-го року схвалила Акчный план про творіня прав народностных меншын на період років 2026 аж 2029. Приятя того плану є частьов повніня обовязків, котры суть потребны в приступовых переговорах Сербії до Европской унії.

Акчный план про творіня прав народностных меншын обсягує области, котры суть важны про окремы меншыны, як наприклад култура, освіта, інформованя, хоснованя языка в уряднім контакті. Тоты области суть прямо в компетенціях націоналных совітів – самосправных орґанів, котры мають народностны меншыны в Сербії.

Окрем того в споминанім документі споминать ся і рівноправна участь народностных меншын в общественнім жывоті Републікы Сербія ці забороніня діскрімінації, і акчный план бы мав принести міцнішы інштітуціоналізованы рамкы што до прав народностных меншын обще.

Документ за інформаціями аґентуры Рутенпрес быв пририхтованый у співпраці із Коордінаційов націоналных совітів народностных меншын, значіть вшыткы офіціално вызнаны меншыны в Сербії могли брати участь на його творіню.

Перед роком вшыткы націоналны совіты дали свої пропозіції в рамках анекты із 70-ма вопросами в слідуючіх областях – забороніня діскрімінації, култура, медії, слобода віроісповіданя, хоснованя языка і писма в уряднім контакті, освіта, демократічна партіціпація, забезпечованя роботы, націоналный совіт, совіт про меджінародны одношіня, економічный розвиток, меджінародна співпраца.

Сербія пожадала о членство в Европскій унії в децембрі 2009-го року. Статус кандідатьской країны їй быв уділеный в марці 2012-го року. Приступовы переговоры почали ся в януарі 2014-го року і дотеперь одклрыло ся із Сербійов понад двадцять із 35-ох приступовых капітол. В посліднім часі процес спомалив ся.