Сумар дня на 2. липця/юлия 2026 р.

Приносиме вам сумар медияльной ґрупы ЛЕМ.фм+ на ден 2. липця/юлия 2026 р.

Памят о Богдані Ґамбалю і 35. річниця реактивациі Стоваришыня «Руска Бурса» в Ґорлицях

Днес выпадат 6. річниця смерти бл. п. Богдана Ґамбаля, думкодавці нашого радия ЛЕМ.фм та заслуженого лемківского діяча. В звязку з тым в найблизшу суботу просиме вшыткых до спільной молитвы за Покійного, яка буде на Святій Горі Явір (початок о год. 11.30). Пак просиме в порогы ґорлицкой Руской Бурсы, де пройдут святкуваня 35-лiтя реактивациi Стоваришыня «Руска Бурса» (што было можливе і завдякы Богданови Ґамбальови), а тiж 15-лiтя Радия ЛЕМ.ФМ. О 17 год. плянувана є прелекция проф. Анны Мусь зо Шлезского Унiверситету пн. «Ruch etnoregionalistyczny na Górnym Śląsku. Proces narodowotwórczy czy sprzeciw wobec nacjonalizującego państwa?». Пак – одомаш. Запрашаме вшыткых охочых взяти участ в святкуваню.

Бесіда о лемківскым языку і Словник

Уж заран заохочаме зайти до Осередка Культуры в Устю Рускым, де одбуде ся стріча з назвом «Бесіды в языку і о языку», промуюча Контекстуальный Словник Лемківского Языка під ред. проф. Олены Дуць-Файфер. В подіі возмут участ проф. Олена Дуць-Файфер, проф. Юстина Олько, проф. Павел Малецкій і члены словникового ансамблю. В рамках проґраму выступит тіж ансамбль Лада. Як заявила проф. Олена Дуць-Файфер, бесіда буде о словнику, але не лем, тіж шырше о нашым языку. Беручы участ в стрічы специялисты смотріти будут на язык з ріжных перспектив. Орґанізаторы просят ся присісти, послухати, влучыти ся до бесіды. Початок о 17.00 год.

Приосиме на 46. Лемківску Ватру на Чужыні

В днях 31. липця/юлия-2. серпня/авґуста в Михалові загорит 46. Лемківска Ватра на Чужыні, яку орґанізує Стоваришыня Лемків. В сценічным проґрамі запрезентуют ся русиньскы ансамблі з Польщы, але і заграниці. Окрeм концертiв, варштатів i спільнотового святкуваня, орґанізаторы рыхтуют м.ін. Зону Дискусий i Выміны Поглядів ци стрічу з особами, што рыхтували госла до Контекстуального Словника Лемківского Языка. Будут і дальшы новы атракциі, о котрых орґанізаторы неодолга зачнут шырше інформувати в социяльных медиях. Вступне на Ватру буде мож придбати тіж онляйн. Орґанізаторы помалы одкрывают першы карты – іде цікава, модерна капманія, яку можете слідити на Фейсбуку на сайті Лемківска Ватра в Михалові та на Інстаґрамі – watra_michalow.

Парк Полонины перейде зонацию

Нацийональный Парк Полонины, што ся находит на Словациі, буде мал по зонациі 32 809 гектарів. Зона А з пятым – найвысшым ступеньом охороны, бы мала творити 19,1 процента териториі. Выходит то з пропозициі зонациі, котру зробило Міністерство Жывотного Оточыня Словациі. Полонины будут по зонациі поділены до штырьох зон. Зона A буде мала 6293 гектары. 1718 гектарів буде мала подля ресорту зона B, і з четвертым ступеньом охороны, што творит 5,24% териториі парку Полонины. Зона C з третім ступеньом охороны буде творила 68,3% обшыри. Другій ступін охороны буде в зоні D, котра буде мала 2375 гектарів. До териториі парку пропонує ресорт приєднати і територию природной резервациі Рыдошова. Ресорт припомянул, же Рыдошова є частю світовой природной дідовизны UNESCO – Стары буковы лісы і буковы пралісы Карпат і іншых реґіонів Европы.