Фалшыве обчутя

Голосованя Европского парламенту із 8-го юла того року може вызерати так, же Европа ся обчула холем в єдній справі односно Україны. Но оно то з тым обчутьом не є так цалком правда, і знова сьме лем свідками толеранції нетолеровательного.

За што властно европарламент заголосовав? Евродепутаты у своїм узнесіню выразили „жаль“ над рішіньом україньского презідента Володиміра Зеленьского назвати елітный воєньскый одділ по „героях“ УПА. Означіли то за „акт непотребной і невыпровокованой ескалації“ із боку Зеленьского односно Польщі.

В узнесіню ся пише, же Зеленьского рішіня шкодить добрым сусідьскым односинам Україны і Польщі, і векшына наратіву є така, як кебы мало іти лем о даякый конфлікт меджі тыма двома країнами.

Але наконець то аж так зле „не є“. Европскый парламент в узнесіню звернув увагу і на то, же дане рішіня Зеленьского є в незгоді із европскыма цінностями.

Ту бы ся хотіло закричати: Слава здоровому розуму! Наконець в Бруселі збачіли, же Україна прославлять „героїв“, котры в демократічній европскій країні бы ниґда героями быти не могли. Лемже оно то так цалком із тым здоровым розумом і обчутьом европскых депутатів так само не є.

Бо тото, што было наконець схвалене, є пропозіція, котра вышла од Европской людовой партії. Лемже была там і інша верзія, передкладана польсков партійов Право і справедливость. В тім узнесіню ся жадало, жебы Европска комісія не одкрывала далшы капітолы приступовых переговорів із Українов, покля Київ не признать етнічны чісткы, котры реалізовала УПА проти Поляків, і масовы суровости проти Жыдів.

Партія польского політічного матадора Качыньского так само у своїй пропозіції узнесіня апеловала на Україну, жебы одсудила ідеолоґію, сімболіку і діятельность УПА, узнала злочіны проти польского і жыдівского населіня, і постарала ся о ексгумації і достойны похороны жертв. Лемже тота пропозіція узнесіня не перешла.

Резултатом буде, же київскый вовк буде все голоднішый, а овець буде все менше.

І ту выникать вопрос. Із чім мав Европскый парламент проблему, жебы підтримати твердшу верзію узнесіня? Тадь на єднім боці было прияте узнесіня, же названя воєньского одділу по „героях“ УПА не є в згоді із европскыма цінностями. А на другім боці тоты цінности уж не є треба хранити і тым, жебы кандідатьска країна ясно одсудила діятельность УПА, перестала з них робити героїв, і ясно вызнала а одсудила злочіны, котры бандерівці зробили?

І так треба ясно повісти, же знова сьме лем свідками якойсь брусельской еквілібрістікы, котра навеце має намагу рішучу вагу проблемы із героізаційов УПА перенести лем на якыйсь історічный спор меджі єднов свойов членьсков країнов, і єднов кандідатьсков.

Лемже каждый, хто холем на момент перешов коло історічных даных знає, же героізація УПА не є абсолутно лем о спорі Польщі і Україны. Є то о тім, ці дозволиме в демократічній Европі прославляня націстічных колаборантів, злочінців обще, або ніт. Ці за тыма своїма цінностями, котрыма ся радо оганяме, реално стоїме, або суть то днесь уж лем флоскулы, якы не суть варты ани корчмовой дебаты.

То, за што заголосовали депутаты Европского парламенту, може на першый погляд вызерати як обчутя. Но є то знова лем фалшыве обчутя. Дакус сьме „погрозили“, але очі зістали засліплены, і Україна є жертва, котра з тітулу свого терпіня може вшытко.

Брусел знова намагать ся робити так, жебы быв і вовк сытый, і вівця ціла. Холем собі думать, же так робить. Но фактом є, же цілы рокы зеперать очі перед такыма ділами, котры бы жадній іншій кандідатьскій країні не перешли ниґда.

Резултатом такого діяня односно Україны буде то, же київскый вовк буде все голоднішый, а овець буде все менше.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.