В Ужгороді хотять мати Площу Володиміра Микиты

Як інформовала Ужгородьска містьска рада на своїм офіціалнім сайті на сіті Facebook, од 15-го юла до 15-го авґуста 2026-го року проходять гражданьскы діскусії односно переменованя уліці і площі в Ужгороді.

Уліцю Рєпіна хотять назвати по вызначнім лікарьови – хірурґови Васильови Русинови. Площу Лаборця хотять назвати по вызначнім русиньскім малярьови Володимірови Микитови.

Якраз пропозіція на то, жебы была Площа Володиміра Микиты, выкликує і неґатівны одзывы. Ішло бы уж о третю назву площі в куртім часі.

Площа Лаборця мала назву Площа Пушкіна. По початку повноформатовой російской войны у 2022-ім році была з того місця демонтована буста Пушкіна, і площу назвали по князьови Лаборцьови. Теперь бы ся знова мінила назва, што значіть про людей і адміністратівны обовязкы, якы выходюять із зміны адресы.

На другім боці є то шанса, жебы Ужгород мав названу площу по вызначній русиньскій особности сучасности.

Припоминаме, же кедь в 2019-ім році была пропозіція, жебы переменовати в Ужгороді Уліцю Антона Кашшая на Уліцю Володиміра Фединишинця, правіцьовы україньскы екстремісты із політічной партії Свобода, як із орґанізації Карпатська січ, протестовали проти такого кроку. Названя уліці по вызначнім русиньскім писательови втогды означіли наприклад і за „сепаратістічну ганьбу“.

Володимір Микита (рр. 1931 – 2025) быв вызначный русиньскый малярь, продовжователь славной Підкарпатьской русиньской малярьской школы.

За свої умелецькы досягненя быв удостоєный званями Заслуженого художника Україны, Народного художника Україны, члена корешпондента і академіка Націоналной академії умень Україны.

У 2001-ім році став лавреатом русиньской Премії імени Штефана Чепы за вызначный вклад до русиньской културы. У 2005-ім році быв лавреатом Націоналной премії Україны імени Тараса Шевченка. В році 2021 став Володимір Микита першым лавреатом Націоналной премії за русиньске уменя імени Івана Манайла Pro Arte Ruthenorum.