Митрополіта Йона оголосив юбілейный рік

Праздник блаженого пряшівского єпіскопа і мученика Павла Петра Ґойдіча в пятніцю 17-го юла 2026-го року одсвятковали і в пряшівскім Катедралнім соборі святого Йоана Крестителя.

Як інформовав говорця Пряшівской архієпархії Михал Павлишиновіч, пряшівскый архієпіскоп митрополіта Йона Максим при тій нагоді одслужыв архієрейску літурґію. Вєдно з Высокопреосвященым владыком Йоном служыли священици і діаконы архієпархії, участна была і чісленна комуніта монашок.

На кінцю літурґії владыка і священици пішли до бочной каплічкы, де суть мощі священомученка Павла Петра Ґойдіча, і там помолили ся молебен ку блаженому.

Завершіньом того торжества было оголошіня юбілейного року блаженых єпіскопів мучеників Павла Петра Ґойдіча і Василія Гопка, котрый ся в Пряшівскій архієпархії буде святковати од 4-го новембра того року, коли собі припомянеме 25 років од беатіфікації владыкы Ґойдіча, і тырвати буде до 5-го новембра 2027-го року.

Юбілейный рік буде роком річніць єпіскопскых хіротоній пряшівскых єпіскопів. 25-го марца 2027-го року буде точно сто років од єпіскопской хіротонії владыкы Ґойдіча в Базиліці святого Клімента в Римі, 11-го мая 2027-го року буде 80 років од єпіскопской хіротонії владыкы Гопка, котра одбыла ся в пряшівскім Катедралнім соборі святого Йоана Крестителя.

Фото: Штефан Вашко