Сумар дня на 23. липця/юлия 2026 р.

Приносиме вам сумар медияльной ґрупы ЛЕМ.фм+ на ден 23. липця/юлия 2026 р.

Поломництво Копальників на Святу Гору Грабарку

Як інформує православна парохія Святой Тройці в Любіні, мож ся уж записувати до участи в другым поломництві копальників на Святу Гору Ґрабарку. Поломництво нижньошлезскых копальників обуде ся в серпни/авґусті – на праздник Преображыня Господнього, з благословліня владыкы Юрия, архієпископа вроцлавско-щеціньской єпархіі Польской Автокефальной Православной Церкви. Владыка Юрий призначыл якісый час тому капеляна для копальників, якым єст о. прот. Богдан Репела, любіньскій парох. Поломничество своім патронатом обняла компанія KGHM. Одбуде ся оно в днях од 17. до 19. серпня/авґуста. Деталі найдете на сайті любіньской парохіі.

36. Лемківска Ватра в Лугах

В найвлизшый вікенд в Лугах в любушскым воєвідстві загорит 36. Лемківска Ватра, яку орґанізує Стоваришыня Лемко Товер зо Стшелец Краєньскых. В проґрамі тогорічной Ватры запрезентуют ся м.ін. Лемко Товер Юньор, Ластівочка, Ластівчата, Кычера, Юлия Дошна, Троянда, Бурян, Серенча, Дуляровы Братя ци Надія. Подія зачынат ся пятницю і потырват аж до неділі над раном. В неділю буде служба в православній церкви в Лугах. Участникы Ватры можут корыстати і з природы – воды та пляжы, де недалеко загорит ватра.

46. Лемківска Ватра на Чужыні

В днях од 31. липця/юлия до 2. серпня/авґуста буде проходила 46. Лемківска Ватра на Чужыні в Михалові. Заохочаме слідити маркетінґову кампанію подіі, яка проводит ся в сіти Фейсбук і на Інстаґрамі. Орґанізаторы – Стоваришыня Лемків – оприлюднили уж ціны білетів на тогорічну Ватру. Ціна нормального білету то 50 зл на два дни, а білет зо знижком то 40 зл, в рамках специяльной пропомоцийной оферты мож придбати нормальным білет разом з двотомовым Контекстуальным словником лемківского языка в ціні 230 зл. На ватряній сцені выступлят м.ін. Вербунк зо Словациі, Ре-Карпаты, Ластівочка, Кычера, Водограй, Капела Само Полудне і інчы. Окрем того орґáнізаторы плянуют пару дискусийных панелів і выстав. Красні просиме!

«Од Русаль до Яна» в Зындрановій

А уж в найблизшый вікенд 25.-26. липця/юлия Музей Лемківской Культуры в Зындрановій просит на свято «Од Русаль до Яна». В рамках суботнього проґраму, од 16.00 год, предвиджене єст звиджаня музею, промоция книжок і стрічы з авторами, выклады і доповіди, показы ремесла, конкурсы, а тiж положыня квітя в місцях памяти. О 18:00 год. одбуде ся концерт, в котрым выступлят Гудаци і Гудобна Ґрупа Еста. Ден завершыт ся огниском. Недільный проґрам одкрыє богослужыня в церкви св. Миколая в Зындрановій. Пак о 13.00 одбуде ся офіцийне одкрытя подіі і концерт, в котрым запрезентуют ся Свидницкы Геліґонкарі, Капеля Дукляне, Ославяны, Калина, Маковиця, Мариянна Железна і Гоґаш, Карпатія, Гудаци та Бурян. Окрем того будут показ ремесла, конкурсы і забавы. I тот ден завершыт ся огниском.