Сумар дня на 31. липця/юлия 2026 р.

Приносиме вам сумар медияльной ґрупы ЛЕМ.фм+ на ден 31. липця/юлия 2026 р.

Уж днес загорит 46. Лемківска Ватра на Чужыні

Уж днес в Михалові на Нижнім Шлеску загорит 46. Лемківска Ватра на Чужыні. Головный проґрам зачне ся о 18.00 год. По офіцийным одкрытю і розпаліню ватры на сцені выступят м.ін. Хор Зоря, Гудаци, Ре-Карпаты, Вербунк, Бурян, а вечер завершыт Джем Сешын. В суботу по вечырни в церкви св. Михаіла Архангела выступлят дітячы ансамблі, а дальше Ластівочка, Кычера, Капеля Само Полудне, Грайте!, Водограй і Лемкус. Будут тіж варштаты, лісовы купелі, зона для діти, спортовы змаганя та інчы атракциі для цілых родин. Окрем інчого будут і танцювальны варштаты, на котрых загуляте традицийну потрясану. На вечер для охочых буде «хмаропозераня» – ватряны рандкы з участю свашок. Окрем того Стоваришыня Лермків рыхтує для вас шатро бесід, в котрым будете мочы взяти участ в дискусиях на ріжны цікавы темы. Полный проґрам доступный є на профілях Лемківской Ватры на Чужыні в социяльных медиях та на нашым сайті.

Потрібне спертя ремонту церкви в Перегримці

Од парунадцетьох років ведены сут ремонтовы працы при православній церкви в Перегримці. Консервациі была піддана поліхромія, олтар і елементы выпосажыня. Як інформувал о. Роман Дубец, в остатніх роках завершыли выміну вкрытя стріхы, а в тым році зачали выміну ґонтів на вежы. На тоту ціль парохія отримала спертя Підкарпатского Маршалківского Уряду, Уряду Ґміны в Осєку Ясельскым і Воєвідского Консерватора Памятків в Перемышли. На жаль, підчас робіт выявило ся, што в двох місцях підвалины церкви сут в так злым стані, што вымагают выміны. Справа єст барз пильна. Тоты працы не были уняты в кошторисі тогорічных робіт і парохія мусит іх покрыти з власного вкладу. Цілю спертя ремонту церкви в Перегримці была одкрыта соспільна колекта на сайті zrzutka.pl пн. «Remont cerkwi w Pielgrzymce».

Устя Рускє глядат інформаций о цмонтерній каплиці на Комунальным Цмонтері 

Ґміна Устя Рускє глядат старых фотоґрадій і інформаций тыкаючых цмонтерной каплиці на Комунальным Цмонтері в Устю Рускым. Глядают предовшыткым архівальных знимок обєкту ззовни і внутрі, як і інформаций о образі, по котрым днес остала лем рама. Мают они помочы одтворити історию того місця і сохранити єй для будучых поколінь. Особы, котры мают такы материялы, прошены сут о контакт через фейсбуковый профіль ґміны.

Стріча локальных опінійотворчых ґруп про охорону повітря в ґміні Устя Рускє

В найблизшый понедільок 3. серпня/авґуста в Комплексі Шкіл в Устю Рускым одбуде ся стріча локальных опінійотворчых ґруп, в рамках проєкту «Введіня проґраму охороны повітря в ґміні Устя Рускє». Стірча єст направлена на підприємців і представників стоваришынь з обшыри ґміны Устя Рускє. Участникы познают обовязуючы переписы выникаючы з антисмоґового схваліня, доступны проґрамы спертя і дофінансуваня для підприємців і стоваришынь, отримают тіж можливіст консультациі з енерґетичным дорадцьом. Буде і дискусийный панель на тему охороны повітря і протидіяня енерґетичній біді в Устю Рускым.

17. Свято Лосяньскых Мазярів

В найблизшу неділю 2. серпня/авґуста в Мазярскій Загороді в Лоси сімнадцетый уж раз одбуде ся Свято Лосяньскых Мазярів. На подію просят Музей Дворы Карвациянів і Ґладышів в Ґорлицях, Ґмінный Осередок Культуры в Ропі і Майстерня Карпат. В рамках подіі одбудут ся концерты, варштаты, конкурсы показы ремесла і дальшы атракциі. На концертах запрезентуют ся Капеля Древутня, Ансамбль Лада і Руты Увіты.