Конкурз на директора русиньского музея выграв Ян Голодняк

Конкурз на директора Словацького народного музея – Музея русиньской културы (СНМ – МРК) в Пряшові выграв Ян Голодняк. Бывшый пріматор Свідника быв найліпшый спосеред трьох кандідатів.

Выходить то із резултатів, котры были публікованы на офіціалнім вебсайті СНМ. Конкурз одбыв ся 31-го юла 2026-го року в головній будові Словацького народного музея в Братіславі. Окрем Голодняка кандідатуру подала і Люба Кральова – бывша директорка СНМ – МРК, а Радослав Крегель. Крегель на кункурз не пришов.

Музей быв од октобра без директора

СНМ – Музей русиньской културы быв од октобра минувшого року без рядного директора. Ку 22-му октобру была із функції директоркы одкликана Люба Кральова. Без поясніня причін Кральову одкликала втогдышня повірена ґенерална директорка СНМ Андреа Предайньова.

Повіреным директором русиньского музея втогды став Ян Пивоварник, котрый быв од 1-го октобра 2025-го року і рядным директором СНМ – Музея україньской културы у Свіднику.

1-го апріля того року Пивоварник быв „увольненый“ до функції ґенераланого директора Словацького технічного музея в Кошыцях. Од того дня стала повіренов директорков україньского і русиньского музея Людмила Ражина, робітничка україньского музея.

Конкурз на рядного директора СНМ – Музея русиньского културы так проходив по веце як 9-ох місяцях і по двох повіреных директорах.

Знова без участи Русинів

Русиньска народностна меншына не мала жадного представителя у комісії, котра вырішовала о кандідатах на конкурзі. Хоць членове Рады влады СР про народностны меншыны за Русинів звідали ся на можливость партіціповати на конкурзі ґенералной директоркы СНМ Вєрославы Бернатовой, представитель Русинів у комісії не быв.

На конкурзі брали участь Мілан Ян Піліп – председа Округлого стола Русинів Словакії і член Рады влады СР про народностны меншыны за Русинів, а Ян Липиньскый – председа Здружіня інтеліґенції Словеньска, но лем як публіка. Могли давати вопросы, но без будьякых прав на вырішованя.

Комісія мала в складі представителів Словацького народного музея, профсоюзной орґанізації і Міністерства културы СР. Ословленый номіновати до комісії члена не быв ани Уряд уповномоченого влады СР про народностны меншыны.

Хоць як словацька леґіслатіва, так і межінародны договоры, котрых є Словакія сіґнатарьом, ясно встановлюють, же меншыны мають право вырішовати о ділах, котры ся їх дотуляють, в припаді СНМ не є новотов, же представителі меншыны запрошены не были.

І при попереднім конкурзі на директора СНМ – МРК, котрый в 2019-ім році выграла Люба Кральова, представитель Русинів у комісії не быв. Додаточно СНМ арґументовав, же єден із робітників СНМ є русиньской народности, і то было презентоване як забезпечіня партіціпації русиньской меншыны.

Ян Голодняк

Інж. Ян Голодняк (1963 р.) є абословентом Высокой школы технічной в Кошыцях. В минулости быв посланцьом Містьского заступительства у Свіднику і посланцьом Заступительства Пряшівского самосправного краю. В роках 1999 – 2022 быв заступником пріматора міста Свідник. В тім часі кандідовав за центрістічно-правіцьову партію SDKÚ-DS, котрой лідером быв Мікулаш Дзурінда.

В роках 2010 і 2014 быв у комуналных вольбах зволеный за пріматора міста Свідник. Кандідовав втогды як незалежный. В році 2018 быв кандідатом SNS із підпоров партії Smer-SD на посаду пріматора, но свій мандат трерій раз не обгаїв.

В парламентных вольбах у 2020-ім році быв на кандідачнім списку націоналістічной партії – Slovenská národná strana (SNS), але із 71-го місця ся до парламенту не дістав.

Ян Голодняк є познатый в русиньскій комуніті. На посліднім засіданю Округлого стола Русинів Словакії, в маю того року, Голодняк взяв участь і высловив втогды підпору тому, жебы СНМ – Музей русиньскуй културы зістав у Пряшові. То буде якбач перша і найвекша задача нового директора, жебы уратовати музей в Пряшові, і то в достойных, адекватных музею просторах.

Подля нашых інформацій бы новый директор русиньского музея мав быти іншталованый до функції днесь, 6-го авґуста.