Сумар дня на 6. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 6. серпня/авґуста 2026 р.

На михалівскій Ватрі припомянуто ювілей Руской Бурсы і ЛЕМ.фм+

Точно 1. червця/юнія текучого рока минуло 35 років од реактивациі Стоваришыня Руска Бурса в Ґорлицях та 15 років од моменту, коли в ефір пішол сиґнал першого лемківского радия ЛЕМ.фм. З той нагоды вчас першого дня 46. Лемківской Ватры на Чужыні, коли проходила офіцияльна част подіі, Стоваришыня Лемків одзначыло бурсаків і членів медияльной ґрупы ЛЕМ.фм+. Найперше желаня склал Ведучый ГЗ СЛ Андрий Koпча, пак голос мал Секретар ГЗ СЛ Севериян Косовскій, якій спомнул, што выступує в потрійній роли, не лем як фукнцийный Стоваришыня Лемків, але самособом член ґорлицкой Руской Бурсы і редактор радия ЛЕМ.фм. На сцені была присутна і проф. Олена Дуць-Файфер, Заступця Ведучого ГЗ СЛ, але в тым припаді єдна з участничок історичного зобраня з 1. червця/юнія 1991 р. Почестну Грамоту од Стоваришыня Лемків одобрала Ведуча Заряду Стоваришыня Руска Бурса в Ґорлицях Наталия Малецка-Новак. На другій ден бурсакы і редакторы подали ся до оддаленого од Михалова о пару кілометрів Любіна, де на тамтышнім цмонтери спочыват бл. п. Богдан Ґамабаль.

Выстава Працовні Ікон «Мандиліон» – іщы через тыжден

Припоминаме, што до 14. серпня/авґуста в Ґалериі Bielanka73 в Білянці мож іщы видіти выставу Працовні Ікон «Мандиліон». На выставі сут презентуваны іконы авторства Лідиi Трохановской-Пеляк, Анны Трохановской і Мирослава Трохановского. Працовня «Мандиліон» діє од понад 25 років і творит іконы, навязуючы до традициі карпатского іконопису. Вернісаж выставы был 16. липця/юлия. Творці правоцни окрем ікон творят тіж більшы проєкты – як іконостасы ци розписы храмів.

Осінні подіі Стоваришыня Лемків

По закінчыню 46. Лемківской Ватры на Чужыні Стоваришыня Лемків має перед собом іщы три дальшы подіі. Найблизша з них то Лемківска Творча Осін, яка заплянувана є на 19.-20. вересня/септембра. В плянах є іщы орґанізация Стріч Трьох Поколінь з Лемківском Культуром в Пшемкові та Стрічы з Лемківском Культуром в Ґожові Великопольскым. О дрібницях будеме іщы інформувати. Того рока – в маю – Стоваришыня Лемків орґанізувало тіж дводньове РутенАле – Бієнале Лемківской / Русиньской Культуры в Креници і Высовій.

Глядают старых фотоґрафій каплиці на цмонтери в Устю Рускым

Ґміна Устя Рускє глядат старых фотоґрадій і інформаций тыкаючых цмонтерной каплиці на Комунальным Цмонтери в Устю Рускым. Глядают предовшыткым архівальных знимок обєкту ззовни і внутрі, як і інформаций о образі, по котрым днес остала лем рама. Мают они помочы одтворити історию того місця і сохранити єй для будучых поколінь. Особы, котры мают такы материялы, прошены сут о контакт через фейсбуковый профіль ґміны.