Сумар дня на 7. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 7. серпня/авґуста 2026 р.

Директором СНМ – Музею Русиньской Культуры в Пряшові остал Ян Голодняк

Конкурс на директора Словацкого Нацийонального Музею – Музею Русиньской Культуры в Пряшові выграл Ян Голодняк. Бывшый пріматор Свидника был найліпшый спосеред трьох кандидатів. Музей Русиньской Культуры был од жолтня/октобра минулого рока без рядного директора, одколи з функциі директоркы, без поясніня причын, одкликана была Люба Кральова. Повіреным директором русиньского музею остал товды Ян Пивоварник, котрый был од жолтня/октобра і рядным директором СНМ – Музею Украіньской Культуры в Свиднику. 1 квітня/апріля тр. функцию повіреной директоркы украіньского і русиньского музеів обняла Людмила Ражына, робітничка украіньского музею. Конкурс на рядного директора СНМ – Музею Русиньской Культуры так проходил по веце як 9. місяцях і по двох повіреных директорах. Русиньска нацийональна меншына не мала ниякого представника в комісиі, котра вырішыла о кандидатах в конкурсі, мимо того, што члены Рады Влады СР про нацийональны меншыны за Русинів звідали ся на можливіст партиципувати в конкурсі ґенеральной директоркы СНМ Вєрославы Бернатовой. В конкурсі брали участ Русины – представникы русиньскых орґанізаций, но лем як публика, без ниякых прав рішаня. Веце на тоту тему і о новым директорі СНМ – Музею Русиньской Культуры прочытате в дописі на нашым портали.

Єст шанса на реактивацию лыжной стациі в Щавнику

Лыжна стация в Щавнику може єднак быти реактивувана. Реґіональна Дирекция Охороны Середовиска рішыла єднак узгоднити реализацию такой інвестициі, што плянувана єст од дакількох років Польскыма Кабельныма Желізницями (PKL), але дотля была блокувана. Тепер ґміна Мушына має выдати позитивне середовискове рішыня. Подля бургомайстра Яна Ґольбы, може то быти не скорше як о місяц. Реґіональна Дирекция Охороны Середовиска фінальні згаджат ся на на тото, жебы зас побудувати лыжны вытягы в Щавнику, але введены были ограничыня, што мают позитивно влинути на охорону звірят і рослин. Ограничыня будут примірно тыкати годин фунґуваня дакотрых вытягів. Окрем того літом не буде міг діяти вытяг ведучый од половины схылу до самой горы осередка. Скоршы процедуры тырвали 1,5 р. і завершыли ся неґативном опінійом. Тепер вернула шанса на реализацию інвестициі, але до єй старту буде потібне іщы позволіня на будову.

”Енді Варголь. Од крискы до звізды” в Палаци Штукы в Кракові 

Уж од днес в Палаци Штукы в Кракові мож обзерати выставу ”Енді Варголь. Од крискы до звізды”. Експозиция зосереджат ся на періоді, коли Варголь іщы лем будувал свій характеристичный стиль і творил власный артистичный образ. На одвиджаючых жде понад 60 ориґінальных рисунків, сітодруків, поляроідів, плякатів і фільмовых материялів. Серед найвекшых атракций найде ся монумнетальна інсталяция “Cow Wallpaper”, што чыслит веце як 30 квадратных метрів. Выстава вкаже тіж барз рідкы проєкты тканин з 50 років, вшыты з них облечыня, першы номеры леґендарного маґазину “Interview”, окладинкы книжок і вінильовых платен авторства Варголя та його піонєрскы цифровы експерименты на компутері Commodore. Выстава буде доступна в Палаци Штукы в Кракові до 27. вересня/септембра тр.