Сумар дня на 4. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 4. вересня/септембра 2026 р.

Торжества в ден памяти священномученика Максима Ґорлицкого

В найблизшых днях православны Лемкы святочні припомнут священномученика Максима Ґорлицкого. Головны торжества на Лемковині пройдут в днях 5. і 6. вересня/септембра в катедральній церкви в Ґорлицях. Заран о 17.00 год. в ґорлицкій катедрі буде правлена всеночна. В ден свята – неділю 6. вересня/септембра, перша Літургія буде служена о 6.00 рано, пак о 8.30 чытаный буде акафист перед мощами св. Максима. О год. 9.45 привитаны будут прибывшы єрархы, а о 10.00 год. зачне ся головна св. Літургія. На свято покровителя перемышльско-ґорлицкой єпархіі традицийні піде і піше поломництво. Зачне ся оно заран рано о 5.00 год св. Літургійом в церкви Покровы Пресвятой Богородиці в Ждыни, де хрещеный был св. Максим. Пак поломникы підут через Ждыню, Ґладышів, Маластівску Маґуру, Рыхвалд, Сяры і Ґорлиці.

В Петровцях одсвяткуют 190. річницю основаня грекокатолицкой парохіі

Заран, в суботу 5. вересня/септембра в Петровцях в Хорвациі одбуде ся святкуваня 190. річниці основаня грекокатолицкой парохіі. Як інформувала Крижевацка Єпархія, архієрейску літургію в містній Церкви Покровы Пресвятой Богородиці одслужыт крижевацкій єпарха кыр Мілян Стіпіч. Участны будут і владыка Ґеорґій Джуджар – правлячый єпископ Єпархіі святого Николая в Рускым Керестурі та римокатолицкій архієпископ митрополита дяковацко-осієцкій Дюро Хранич. Празднуваня річниці основаня парохіі в Петровцях збогатит і Хор грекокатолицкой Базилікы Сошествія святого Духа з Михаловців на Словациі. Петровці сут єдном з найстаршых парохій Крижевацкой Єпархіі. В торжестві мают брати участ і представникы містной і реґіональной самосправы, хорватского парляменту, інституций і орґанізаций. Історию парохіі в Петровцях прочытате в дописі на нашым портали.

Лемківска пєса одпрезентує ся в рамках Театральных Стріч Інновиця

Тырват 19. едиция Театральных Стріч Інновиця, орґанізуваных Стоваришыньом Приятелів Новиці. В проґрамі театр, танец, концерты, варштаты і стрічы з природом Маґуры. Того рока вашу увагу можут притягнути особливо два пункты проґраму близко звязяны з лемківскым середовиском. Уж заран о 14.00 год. в Новици мож буде обізрити спектакль «Три ябка» зреализуваный перед роком в рамках діяльности Стоваришыня «Руска Бурса» в Ґорлицях. Білеты сут дармовы – до одобраня в дни спектаклю в Фестівальовым Бюрі. Другым пунктом, коло котрого не мож перейти обоятно, то суботня прелекция Анджея Жыґадла «Деревце. Образы погранича» (год. 17.30). Артиста буде бесідувал о образі, котрый намалювал в 2017 році з нагоды 70. річниці акциі «Вісла». Образ нашол ся на офіцийным плякаті цілолемківксых упамятнінь. Веце чытайте в дописі на нашым портали.

ЛЕМ.фм з концесийом на дальшых 10 років!

В минулу середу 2. вересня/септембра засідала Державна Рада Радийофоніі і Телевізиі. Рішали ся справы тыкаючы м.ін. концесий, проґрамовых змін, ситуациі публичных медий і абонаментовых вплывів. Окрем інчого Державна Рада Радийфоніі і Телевізиі уділила на дальшых 10 років концесию признану для Стоваришыня «Руска Бурса» в Ґорлицях на пошыряня радийового проґраму «лем.фм». Полный комунікат мож чытати в Сервісі Польской Республикы.