Сумар дня на 28. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 28. вересня/септембра 2026 р.

Словацко-польска ініциятива для охороны карпатскых лісів

Рушыла трансгранична ініциятива BIOBRIDGE PL-SK. Головном цілю проєкту єст ратуваня і одбудуваня найбарже загороженых ґатунків дерев выступуючых в лісах Низкого Бескіду, особливо тису і ялиці. Лідедром проєкту єст Нацийональный Лісовый Центр зо Словациі, а партнерами Лісы Словацкой Республикы і Державны Лісы – Надлісництво Лося. В рамках ініцятивы в приграничных лісах посадят 10 тис. новых дерев. Проєкт закладат тіж охорону найціннійшых становиск загороженых ґатунків, молоды дерева будут огороджены. Окрем того науковці проведут ґенетичны досліджыня, што позволят вытипувати найціннійшы і одпорны дерева. В охороні карпатской природы схоснуваны будут модерны технолоґіі – термальны дроны, лясерове скануваня і сателітарны знимкы. То поволит моніторувати стан здоровля, находити огниска хворіт і успішнійшу борбу зо шкідниками. Окрем того важным елементом проєкту буде еколоґічна едукация жытелів погранича. По обох странах границі возникнут едукацийны стежкы. Заплянувано тіж тереновы прогулькы, варштаты і подіі популяризуючы знаня о лісах. Проєкт єст реализуваный в рамках проґраму Інтерреґ Польща-Словация 2021-2027. Дофінансуваня з Европейского Фонду Реґіонального Розвитку выносит понад 1,1 млн евро. Вшыткы активности потырвают до кінця мая 2028 р.

Санкова отримала дофінансуваня на розбудову роверовых трас

В ґміні Санкова появлят ся новы біциґльовы стежкы. Ґміна отримала на тоту ціль в сумі 19,5 млн злотых. До кінця вересня/септембра 2028 р. побудуют там 6,5 км новых трас. Ґміна хоче зобрати вшыткы трасы в функцийональну сіт, котра позволит безпечні порушати ся біциґльом медже поєдныма місцевостями і найважнійшыма пунктами ґміны. Розбудуваны будут істнуючы стежкы, як і побудуваны цілком новы одтинкы. Серед найважнійшых інвестиций находит ся розбудова стежок при повітовых дорогах в сторону курорту Вапенне і Рыхвалду, як і будова новой роверовой дорогы на трасі Санкова-Домініковиці. Нова інфраструктура появит ся тіж при ґмінных дорогах. Власти ґміны підкрисляют, што будова стежок єст частю векшого пляну розвитку Санковой – творіня рекреацийно-выпочынковой оферты, што ма лучыти туристичны атракциі, постепенно возникаючу нічлігову базу і курортны валоры. Інвестициі в Санковій будут реализуваны паралельно з проєктами рыхтуваныма містом Ґорлиці і ґміном Ґорлиці. Кєд інвестициі будут одповідньо получены, жытелі і туристы можут зыскати о вельо векшу, спійну сітку біциґльовых трас в тій части ґорлицкого повіту.

Новый перехід через Вислоку

В Крампній ближыт ся ґу кінцьови будова нового переходу через Вислоку. Жельбетова лавка має служыти заєдно шоферам, як і пішым. Двигне поізды з вагом до 15 тон. Заступит доперерішню переправу бродом і підшішену лавку. Новый перехід має поправити комунікацию з Гутом Крампском і запевнити можливіст переізду тіж товды, коли высокій рівен воды не позвалят перейти Вислокы бродом. Для жытелів буде то предовшыткым нове, цілорічне получыня, а для одвиджаючых Низкій Бескід – черговый елемент інфраструктуры злегшаючый порушаня ся по тій части Маґурского Нацийонального Парку. До завершыня інвестициі остали уж остатні працы і формальности звязаны з одобраньом обєкту.